{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa084.htm","path":"bib/vul/psa084.htm","source_url":"https://sacred-texts.com/bib/vul/psa084.htm","text":"1 In finem, filiis Core. Psalmus.\n2\u00a0[Benedixisti, Domine, terram tuam;\n avertisti captivitatem Jacob.\n3\u00a0Remisisti iniquitatem plebis tu\u00e6;\n operuisti omnia peccata eorum.\n4\u00a0Mitigasti omnem iram tuam;\n avertisti ab ira indignationis tu\u00e6.\n5\u00a0Converte nos, Deus salutaris noster,\n et averte iram tuam a nobis.\n6\u00a0Numquid in \u00e6ternum irasceris nobis?\n aut extendes iram tuam a generatione in generationem?\n7\u00a0Deus, tu conversus vivificabis nos,\n et plebs tua l\u00e6tabitur in te.\n8\u00a0Ostende nobis, Domine, misericordiam tuam,\n et salutare tuum da nobis.\n9\u00a0Audiam quid loquatur in me Dominus Deus,\n quoniam loquetur pacem in plebem suam,\n et super sanctos suos,\n et in eos qui convertuntur ad cor.\n10\u00a0Verumtamen prope timentes eum salutare ipsius,\n ut inhabitet gloria in terra nostra.\n11\u00a0Misericordia et veritas obviaverunt sibi;\n justitia et pax osculat\u00e6 sunt.\n12\u00a0Veritas de terra orta est,\n et justitia de c\u00e6lo prospexit.\n13\u00a0Etenim Dominus dabit benignitatem,\n et terra nostra dabit fructum suum.\n14\u00a0Justitia ante eum ambulabit,\n et ponet in via gressus suos.]","title":"Vulgate: Psalms: Psalms Chapter 84","type":"page"}