{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa085.htm","path":"bib/vul/psa085.htm","source_url":"https://sacred-texts.com/bib/vul/psa085.htm","text":"1\u00a0Oratio ipsi David. [Inclina, Domine, aurem tuam et exaudi me,\n quoniam inops et pauper sum ego.\n2\u00a0Custodi animam meam, quoniam sanctus sum;\n salvum fac servum tuum, Deus meus, sperantem in te.\n3\u00a0Miserere mei, Domine,\n quoniam ad te clamavi tota die;\n4\u00a0l\u00e6tifica animam servi tui,\n quoniam ad te, Domine, animam meam levavi.\n5\u00a0Quoniam tu, Domine, suavis et mitis,\n et mult\u00e6 misericordi\u00e6 omnibus invocantibus te.\n6\u00a0Auribus percipe, Domine, orationem meam,\n et intende voci deprecationis me\u00e6.\n7\u00a0In die tribulationis me\u00e6 clamavi ad te,\n quia exaudisti me.\n8\u00a0Non est similis tui in diis, Domine,\n et non est secundum opera tua.\n9\u00a0Omnes gentes quascumque fecisti venient,\n et adorabunt coram te, Domine,\n et glorificabunt nomen tuum.\n10\u00a0Quoniam magnus es tu, et faciens mirabilia;\n tu es Deus solus.\n11\u00a0Deduc me, Domine, in via tua, et ingrediar in veritate tua;\n l\u00e6tetur cor meum, ut timeat nomen tuum.\n12\u00a0Confitebor tibi, Domine Deus meus, in toto corde meo,\n et glorificabo nomen tuum in \u00e6ternum:\n13\u00a0quia misericordia tua magna est super me,\n et eruisti animam meam ex inferno inferiori.\n14\u00a0Deus, iniqui insurrexerunt super me,\n et synagoga potentium qu\u00e6sierunt animam meam:\n et non proposuerunt te in conspectu suo.\n15\u00a0Et tu, Domine Deus, miserator et misericors;\n patiens, et mult\u00e6 misericordi\u00e6, et verax.\n16\u00a0Respice in me, et miserere mei;\n da imperium tuum puero tuo,\n et salvum fac filium ancill\u00e6 tu\u00e6.\n17\u00a0Fac mecum signum in bonum,\n ut videant qui oderunt me, et confundantur:\n quoniam tu, Domine, adjuvisti me, et consolatus es me.]","title":"Vulgate: Psalms: Psalms Chapter 85","type":"page"}