{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa087.htm","path":"bib/vul/psa087.htm","source_url":"https://sacred-texts.com/bib/vul/psa087.htm","text":"1 Canticum Psalmi, filiis Core, in finem, pro Maheleth ad respondendum. Intellectus Eman Ezrahit\u00e6.\n2\u00a0[Domine, Deus salutis me\u00e6,\n in die clamavi et nocte coram te.\n3\u00a0Intret in conspectu tuo oratio mea,\n inclina aurem tuam ad precem meam.\n4\u00a0Quia repleta est malis anima mea,\n et vita mea inferno appropinquavit.\n5\u00a0\u00c6stimatus sum cum descendentibus in lacum,\n factus sum sicut homo sine adjutorio,\n6\u00a0inter mortuos liber;\n sicut vulnerati dormientes in sepulchris,\n quorum non es memor amplius,\n et ipsi de manu tua repulsi sunt.\n7\u00a0Posuerunt me in lacu inferiori,\n in tenebrosis, et in umbra mortis.\n8\u00a0Super me confirmatus est furor tuus,\n et omnes fluctus tuos induxisti super me.\n9\u00a0Longe fecisti notos meos a me;\n posuerunt me abominationem sibi.\n Traditus sum, et non egrediebar;\n10\u00a0oculi mei languerunt pr\u00e6 inopia.\n Clamavi ad te, Domine, tota die;\n expandi ad te manus meas.\n11\u00a0Numquid mortuis facies mirabilia?\n aut medici suscitabunt, et confitebuntur tibi?\n12\u00a0Numquid narrabit aliquis in sepulchro misericordiam tuam,\n et veritatem tuam in perditione?\n13\u00a0Numquid cognoscentur in tenebris mirabilia tua?\n et justitia tua in terra oblivionis?\n14\u00a0Et ego ad te, Domine, clamavi,\n et mane oratio mea pr\u00e6veniet te.\n15\u00a0Ut quid, Domine, repellis orationem meam;\n avertis faciem tuam a me?\n16\u00a0Pauper sum ego, et in laboribus a juventute mea;\n exaltatus autem, humiliatus sum et conturbatus.\n17\u00a0In me transierunt ir\u00e6 tu\u00e6,\n et terrores tui conturbaverunt me:\n18\u00a0circumdederunt me sicut aqua tota die;\n circumdederunt me simul.\n19\u00a0Elongasti a me amicum et proximum,\n et notos meos a miseria.]","title":"Vulgate: Psalms: Psalms Chapter 87","type":"page"}