{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa088.htm","path":"bib/vul/psa088.htm","source_url":"https://sacred-texts.com/bib/vul/psa088.htm","text":"1 Intellectus Ethan Ezrahit\u00e6.\n2\u00a0[Misericordias Domini in \u00e6ternum cantabo;\n in generationem et generationem annuntiabo veritatem tuam in ore meo.\n3\u00a0Quoniam dixisti: In \u00e6ternum misericordia \u00e6dificabitur in c\u00e6lis;\n pr\u00e6parabitur veritas tua in eis.\n4\u00a0Disposui testamentum electis meis;\n juravi David servo meo:\n5\u00a0Usque in \u00e6ternum pr\u00e6parabo semen tuum,\n et \u00e6dificabo in generationem et generationem sedem tuam.\n6\u00a0Confitebuntur c\u00e6li mirabilia tua, Domine;\n etenim veritatem tuam in ecclesia sanctorum.\n7\u00a0Quoniam quis in nubibus \u00e6quabitur Domino;\n similis erit Deo in filiis Dei?\n8\u00a0Deus, qui glorificatur in consilio sanctorum,\n magnus et terribilis super omnes qui in circuitu ejus sunt.\n9\u00a0Domine Deus virtutum, quis similis tibi?\n potens es, Domine, et veritas tua in circuitu tuo.\n10\u00a0Tu dominaris potestati maris;\n motum autem fluctuum ejus tu mitigas.\n11\u00a0Tu humiliasti, sicut vulneratum, superbum;\n in brachio virtutis tu\u00e6 dispersisti inimicos tuos.\n12\u00a0Tui sunt c\u00e6li, et tua est terra:\n orbem terr\u00e6, et plenitudinem ejus tu fundasti;\n13\u00a0aquilonem et mare tu creasti.\n Thabor et Hermon in nomine tuo exsultabunt:\n14\u00a0tuum brachium cum potentia.\n Firmetur manus tua, et exaltetur dextera tua:\n15\u00a0justitia et judicium pr\u00e6paratio sedis tu\u00e6:\n misericordia et veritas pr\u00e6cedent faciem tuam.\n16\u00a0Beatus populus qui scit jubilationem:\n Domine, in lumine vultus tui ambulabunt,\n17\u00a0et in nomine tuo exsultabunt tota die,\n et in justitia tua exaltabuntur.\n18\u00a0Quoniam gloria virtutis eorum tu es,\n et in beneplacito tuo exaltabitur cornu nostrum.\n19\u00a0Quia Domini est assumptio nostra,\n et sancti Isra\u00ebl regis nostri.\n20\u00a0Tunc locutus es in visione sanctis tuis,\n et dixisti: Posui adjutorium in potente,\n et exaltavi electum de plebe mea.\n21\u00a0Inveni David, servum meum;\n oleo sancto meo unxi eum.\n22\u00a0Manus enim mea auxiliabitur ei,\n et brachium meum confortabit eum.\n23\u00a0Nihil proficiet inimicus in eo,\n et filius iniquitatis non apponet nocere ei.\n24\u00a0Et concidam a facie ipsius inimicos ejus,\n et odientes eum in fugam convertam.\n25\u00a0Et veritas mea et misericordia mea cum ipso,\n et in nomine meo exaltabitur cornu ejus.\n26\u00a0Et ponam in mari manum ejus,\n et in fluminibus dexteram ejus.\n27\u00a0Ipse invocabit me: Pater meus es tu,\n Deus meus, et susceptor salutis me\u00e6.\n28\u00a0Et ego primogenitum ponam illum,\n excelsum pr\u00e6 regibus terr\u00e6.\n29\u00a0In \u00e6ternum servabo illi misericordiam meam,\n et testamentum meum fidele ipsi.\n30\u00a0Et ponam in s\u00e6culum s\u00e6culi semen ejus,\n et thronum ejus sicut dies c\u00e6li.\n31\u00a0Si autem dereliquerint filii ejus legem meam,\n et in judiciis meis non ambulaverint;\n32\u00a0si justitias meas profanaverint,\n et mandata mea non custodierint:\n33\u00a0visitabo in virga iniquitates eorum,\n et in verberibus peccata eorum;\n34\u00a0misericordiam autem meam non dispergam ab eo,\n neque nocebo in veritate mea,\n35\u00a0neque profanabo testamentum meum:\n et qu\u00e6 procedunt de labiis meis non faciam irrita.\n36\u00a0Semel juravi in sancto meo, si David mentiar:\n37\u00a0semen ejus in \u00e6ternum manebit.\n Et thronus ejus sicut sol in conspectu meo,\n38\u00a0et sicut luna perfecta in \u00e6ternum,\n et testis in c\u00e6lo fidelis.\n39\u00a0Tu vero repulisti et despexisti;\n distulisti christum tuum.\n40\u00a0Evertisti testamentum servi tui;\n profanasti in terra sanctuarium ejus.\n41\u00a0Destruxisti omnes sepes ejus;\n posuisti firmamentum ejus formidinem.\n42\u00a0Diripuerunt eum omnes transeuntes viam;\n factus est opprobrium vicinis suis.\n43\u00a0Exaltasti dexteram deprimentium eum;\n l\u00e6tificasti omnes inimicos ejus.\n44\u00a0Avertisti adjutorium gladii ejus,\n et non es auxiliatus ei in bello.\n45\u00a0Destruxisti eum ab emundatione,\n et sedem ejus in terram collisisti.\n46\u00a0Minorasti dies temporis ejus;\n perfudisti eum confusione.\n47\u00a0Usquequo, Domine, avertis in finem?\n exardescet sicut ignis ira tua?\n48\u00a0Memorare qu\u00e6 mea substantia:\n numquid enim vane constituisti omnes filios hominum?\n49\u00a0Quis est homo qui vivet et non videbit mortem?\n eruet animam suam de manu inferi?\n50\u00a0Ubi sunt misericordi\u00e6 tu\u00e6 antiqu\u00e6, Domine,\n sicut jurasti David in veritate tua?\n51\u00a0Memor esto, Domine, opprobrii servorum tuorum,\n quod continui in sinu meo, multarum gentium:\n52\u00a0quod exprobraverunt inimici tui, Domine;\n quod exprobraverunt commutationem christi tui.\n53 Benedictus Dominus in \u00e6ternum. Fiat, fiat.]","title":"Vulgate: Psalms: Psalms Chapter 88","type":"page"}