{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa089.htm","path":"bib/vul/psa089.htm","source_url":"https://sacred-texts.com/bib/vul/psa089.htm","text":"1\u00a0Oratio Moysi, hominis Dei. [Domine, refugium factus es nobis\n a generatione in generationem.\n2\u00a0Priusquam montes fierent,\n aut formaretur terra et orbis,\n a s\u00e6culo et usque in s\u00e6culum tu es, Deus.\n3\u00a0Ne avertas hominem in humilitatem:\n et dixisti: Convertimini, filii hominum.\n4\u00a0Quoniam mille anni ante oculos tuos\n tamquam dies hesterna qu\u00e6 pr\u00e6teriit:\n et custodia in nocte\n5\u00a0qu\u00e6 pro nihilo habentur,\n eorum anni erunt.\n6\u00a0Mane sicut herba transeat;\n mane floreat, et transeat;\n vespere decidat, induret, et arescat.\n7\u00a0Quia defecimus in ira tua,\n et in furore tuo turbati sumus.\n8\u00a0Posuisti iniquitates nostras in conspectu tuo;\n s\u00e6culum nostrum in illuminatione vultus tui.\n9\u00a0Quoniam omnes dies nostri defecerunt,\n et in ira tua defecimus.\n Anni nostri sicut aranea meditabuntur;\n10\u00a0dies annorum nostrorum in ipsis septuaginta anni.\n Si autem in potentatibus octoginta anni,\n et amplius eorum labor et dolor;\n quoniam supervenit mansuetudo, et corripiemur.\n11\u00a0Quis novit potestatem ir\u00e6 tu\u00e6,\n et pr\u00e6 timore tuo iram tuam\n12\u00a0dinumerare?\n Dexteram tuam sic notam fac,\n et eruditos corde in sapientia.\n13\u00a0Convertere, Domine; usquequo?\n et deprecabilis esto super servos tuos.\n14\u00a0Repleti sumus mane misericordia tua;\n et exsultavimus, et delectati sumus omnibus diebus nostris.\n15\u00a0L\u00e6tati sumus pro diebus quibus nos humiliasti;\n annis quibus vidimus mala.\n16\u00a0Respice in servos tuos et in opera tua,\n et dirige filios eorum.\n17\u00a0Et sit splendor Domini Dei nostri super nos,\n et opera manuum nostrarum dirige super nos,\n et opus manuum nostrarum dirige.]","title":"Vulgate: Psalms: Psalms Chapter 89","type":"page"}