{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa090.htm","path":"bib/vul/psa090.htm","source_url":"https://sacred-texts.com/bib/vul/psa090.htm","text":"1\u00a0Laus cantici David. [Qui habitat in adjutorio Altissimi,\n in protectione Dei c\u00e6li commorabitur.\n2\u00a0Dicet Domino: Susceptor meus es tu, et refugium meum;\n Deus meus, sperabo in eum.\n3\u00a0Quoniam ipse liberavit me de laqueo venantium,\n et a verbo aspero.\n4\u00a0Scapulis suis obumbrabit tibi,\n et sub pennis ejus sperabis.\n5\u00a0Scuto circumdabit te veritas ejus:\n non timebis a timore nocturno;\n6\u00a0a sagitta volante in die,\n a negotio perambulante in tenebris,\n ab incursu, et d\u00e6monio meridiano.\n7\u00a0Cadent a latere tuo mille, et decem millia a dextris tuis;\n ad te autem non appropinquabit.\n8\u00a0Verumtamen oculis tuis considerabis,\n et retributionem peccatorum videbis.\n9\u00a0Quoniam tu es, Domine, spes mea;\n Altissimum posuisti refugium tuum.\n10\u00a0Non accedet ad te malum,\n et flagellum non appropinquabit tabernaculo tuo.\n11\u00a0Quoniam angelis suis mandavit de te,\n ut custodiant te in omnibus viis tuis.\n12\u00a0In manibus portabunt te,\n ne forte offendas ad lapidem pedem tuum.\n13\u00a0Super aspidem et basiliscum ambulabis,\n et conculcabis leonem et draconem.\n14\u00a0Quoniam in me speravit, liberabo eum;\n protegam eum, quoniam cognovit nomen meum.\n15\u00a0Clamabit ad me, et ego exaudiam eum;\n cum ipso sum in tribulatione:\n eripiam eum, et glorificabo eum.\n16\u00a0Longitudine dierum replebo eum,\n et ostendam illi salutare meum.]","title":"Vulgate: Psalms: Psalms Chapter 90","type":"page"}