{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa093.htm","path":"bib/vul/psa093.htm","source_url":"https://sacred-texts.com/bib/vul/psa093.htm","text":"1\u00a0Psalmus ipsi David, quarta sabbati. [Deus ultionum Dominus;\n Deus ultionum libere egit.\n2\u00a0Exaltare, qui judicas terram;\n redde retributionem superbis.\n3\u00a0Usquequo peccatores, Domine,\n usquequo peccatores gloriabuntur;\n4\u00a0effabuntur et loquentur iniquitatem;\n loquentur omnes qui operantur injustitiam?\n5\u00a0Populum tuum, Domine, humiliaverunt,\n et h\u00e6reditatem tuam vexaverunt.\n6\u00a0Viduam et advenam interfecerunt,\n et pupillos occiderunt.\n7\u00a0Et dixerunt: Non videbit Dominus,\n nec intelliget Deus Jacob.\n8\u00a0Intelligite, insipientes in populo;\n et stulti, aliquando sapite.\n9\u00a0Qui plantavit aurem non audiet?\n aut qui finxit oculum non considerat?\n10\u00a0Qui corripit gentes non arguet,\n qui docet hominem scientiam?\n11\u00a0Dominus scit cogitationes hominum,\n quoniam van\u00e6 sunt.\n12\u00a0Beatus homo quem tu erudieris, Domine,\n et de lege tua docueris eum:\n13\u00a0ut mitiges ei a diebus malis,\n donec fodiatur peccatori fovea.\n14\u00a0Quia non repellet Dominus plebem suam,\n et h\u00e6reditatem suam non derelinquet,\n15\u00a0quoadusque justitia convertatur in judicium:\n et qui juxta illam, omnes qui recto sunt corde.\n16\u00a0Quis consurget mihi adversus malignantes?\n aut quis stabit mecum adversus operantes iniquitatem?\n17\u00a0Nisi quia Dominus adjuvit me,\n paulominus habitasset in inferno anima mea.\n18\u00a0Si dicebam: Motus est pes meus:\n misericordia tua, Domine, adjuvabat me.\n19\u00a0Secundum multitudinem dolorum meorum in corde meo,\n consolationes tu\u00e6 l\u00e6tificaverunt animam meam.\n20\u00a0Numquid adh\u00e6ret tibi sedes iniquitatis,\n qui fingis laborem in pr\u00e6cepto?\n21\u00a0Captabunt in animam justi,\n et sanguinem innocentem condemnabunt.\n22\u00a0Et factus est mihi Dominus in refugium,\n et Deus meus in adjutorium spei me\u00e6.\n23\u00a0Et reddet illis iniquitatem ipsorum,\n et in malitia eorum disperdet eos:\n disperdet illos Dominus Deus noster.]","title":"Vulgate: Psalms: Psalms Chapter 93","type":"page"}