{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa094.htm","path":"bib/vul/psa094.htm","source_url":"https://sacred-texts.com/bib/vul/psa094.htm","text":"1\u00a0Laus cantici ipsi David. [Venite, exsultemus Domino;\n jubilemus Deo salutari nostro;\n2\u00a0pr\u00e6occupemus faciem ejus in confessione,\n et in psalmis jubilemus ei:\n3\u00a0quoniam Deus magnus Dominus,\n et rex magnus super omnes deos.\n4\u00a0Quia in manu ejus sunt omnes fines terr\u00e6,\n et altitudines montium ipsius sunt;\n5\u00a0quoniam ipsius est mare, et ipse fecit illud,\n et siccam manus ejus formaverunt.\n6\u00a0Venite, adoremus, et procidamus,\n et ploremus ante Dominum qui fecit nos:\n7\u00a0quia ipse est Dominus Deus noster,\n et nos populus pascu\u00e6 ejus, et oves manus ejus.\n8\u00a0Hodie si vocem ejus audieritis,\n nolite obdurare corda vestra\n9\u00a0sicut in irritatione,\n secundum diem tentationis in deserto,\n ubi tentaverunt me patres vestri:\n probaverunt me, et viderunt opera mea.\n10\u00a0Quadraginta annis offensus fui generationi illi,\n et dixi: Semper hi errant corde.\n11\u00a0Et isti non cognoverunt vias meas:\n ut juravi in ira mea:\n Si introibunt in requiem meam.]","title":"Vulgate: Psalms: Psalms Chapter 94","type":"page"}