{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa095.htm","path":"bib/vul/psa095.htm","source_url":"https://sacred-texts.com/bib/vul/psa095.htm","text":"1\u00a0Canticum ipsi David, quando domus \u00e6dificabatur post captivitatem. [Cantate Domino canticum novum;\n cantate Domino omnis terra.\n2\u00a0Cantate Domino, et benedicite nomini ejus;\n annuntiate de die in diem salutare ejus.\n3\u00a0Annuntiate inter gentes gloriam ejus;\n in omnibus populis mirabilia ejus.\n4\u00a0Quoniam magnus Dominus, et laudabilis nimis:\n terribilis est super omnes deos.\n5\u00a0Quoniam omnes dii gentium d\u00e6monia;\n Dominus autem c\u00e6los fecit.\n6\u00a0Confessio et pulchritudo in conspectu ejus;\n sanctimonia et magnificentia in sanctificatione ejus.\n7\u00a0Afferte Domino, patri\u00e6 gentium,\n afferte Domino gloriam et honorem;\n8\u00a0afferte Domino gloriam nomini ejus.\n Tollite hostias, et introite in atria ejus;\n9\u00a0adorate Dominum in atrio sancto ejus.\n Commoveatur a facie ejus universa terra;\n10\u00a0dicite in gentibus, quia Dominus regnavit.\n Etenim correxit orbem terr\u00e6, qui non commovebitur;\n judicabit populos in \u00e6quitate.\n11\u00a0L\u00e6tentur c\u00e6li, et exsultet terra;\n commoveatur mare et plenitudo ejus;\n12\u00a0gaudebunt campi, et omnia qu\u00e6 in eis sunt.\n Tunc exsultabunt omnia ligna silvarum\n13\u00a0a facie Domini, quia venit,\n quoniam venit judicare terram.\n Judicabit orbem terr\u00e6 in \u00e6quitate,\n et populos in veritate sua.]","title":"Vulgate: Psalms: Psalms Chapter 95","type":"page"}