{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa096.htm","path":"bib/vul/psa096.htm","source_url":"https://sacred-texts.com/bib/vul/psa096.htm","text":"1\u00a0Huic David, quando terra ejus restituta est. [Dominus regnavit: exsultet terra;\n l\u00e6tentur insul\u00e6 mult\u00e6.\n2\u00a0Nubes et caligo in circuitu ejus;\n justitia et judicium correctio sedis ejus.\n3\u00a0Ignis ante ipsum pr\u00e6cedet,\n et inflammabit in circuitu inimicos ejus.\n4\u00a0Illuxerunt fulgura ejus orbi terr\u00e6;\n vidit, et commota est terra.\n5\u00a0Montes sicut cera fluxerunt a facie Domini;\n a facie Domini omnis terra.\n6\u00a0Annuntiaverunt c\u00e6li justitiam ejus,\n et viderunt omnes populi gloriam ejus.\n7\u00a0Confundantur omnes qui adorant sculptilia,\n et qui gloriantur in simulacris suis.\n Adorate eum omnes angeli ejus.\n8\u00a0Audivit, et l\u00e6tata est Sion,\n et exsultaverunt fili\u00e6 Jud\u00e6\n propter judicia tua, Domine.\n9\u00a0Quoniam tu Dominus altissimus super omnem terram;\n nimis exaltatus es super omnes deos.\n10\u00a0Qui diligitis Dominum, odite malum:\n custodit Dominus animas sanctorum suorum;\n de manu peccatoris liberabit eos.\n11\u00a0Lux orta est justo,\n et rectis corde l\u00e6titia.\n12\u00a0L\u00e6tamini, justi, in Domino,\n et confitemini memori\u00e6 sanctificationis ejus.]","title":"Vulgate: Psalms: Psalms Chapter 96","type":"page"}