{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa097.htm","path":"bib/vul/psa097.htm","source_url":"https://sacred-texts.com/bib/vul/psa097.htm","text":"1\u00a0Psalmus ipsi David. [Cantate Domino canticum novum,\n quia mirabilia fecit.\n Salvavit sibi dextera ejus,\n et brachium sanctum ejus.\n2\u00a0Notum fecit Dominus salutare suum;\n in conspectu gentium revelavit justitiam suam.\n3\u00a0Recordatus est misericordi\u00e6 su\u00e6,\n et veritatis su\u00e6 domui Isra\u00ebl.\n Viderunt omnes termini terr\u00e6\n salutare Dei nostri.\n4\u00a0Jubilate Deo, omnis terra;\n cantate, et exsultate, et psallite.\n5\u00a0Psallite Domino in cithara;\n in cithara et voce psalmi;\n6\u00a0in tubis ductilibus, et voce tub\u00e6 corne\u00e6.\n Jubilate in conspectu regis Domini:\n7\u00a0moveatur mare, et plenitudo ejus;\n orbis terrarum, et qui habitant in eo.\n8\u00a0Flumina plaudent manu;\n simul montes exsultabunt\n9\u00a0a conspectu Domini:\n quoniam venit judicare terram.\n Judicabit orbem terrarum in justitia,\n et populos in \u00e6quitate.]","title":"Vulgate: Psalms: Psalms Chapter 97","type":"page"}