{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa100.htm","path":"bib/vul/psa100.htm","source_url":"https://sacred-texts.com/bib/vul/psa100.htm","text":"1\u00a0Psalmus ipsi David. [Misericordiam et judicium cantabo tibi, Domine;\n psallam,\n2\u00a0et intelligam in via immaculata: quando venies ad me?\n Perambulabam in innocentia cordis mei, in medio domus me\u00e6.\n3\u00a0Non proponebam ante oculos meos rem injustam;\n facientes pr\u00e6varicationes odivi;\n non adh\u00e6sit mihi\n4\u00a0cor pravum;\n declinantem a me malignum non cognoscebam.\n5\u00a0Detrahentem secreto proximo suo, hunc persequebar:\n superbo oculo, et insatiabili corde, cum hoc non edebam.\n6\u00a0Oculi mei ad fideles terr\u00e6, ut sedeant mecum;\n ambulans in via immaculata, hic mihi ministrabat.\n7\u00a0Non habitabit in medio domus me\u00e6 qui facit superbiam;\n qui loquitur iniqua non direxit in conspectu oculorum meorum.\n8\u00a0In matutino interficiebam omnes peccatores terr\u00e6,\n ut disperderem de civitate Domini omnes operantes iniquitatem.]","title":"Vulgate: Psalms: Psalms Chapter 100","type":"page"}