{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa101.htm","path":"bib/vul/psa101.htm","source_url":"https://sacred-texts.com/bib/vul/psa101.htm","text":"1 Oratio pauperis, cum anxius fuerit, et in conspectu Domini effuderit precem suam.\n2\u00a0[Domine, exaudi orationem meam,\n et clamor meus ad te veniat.\n3\u00a0Non avertas faciem tuam a me:\n in quacumque die tribulor, inclina ad me aurem tuam;\n in quacumque die invocavero te, velociter exaudi me.\n4\u00a0Quia defecerunt sicut fumus dies mei,\n et ossa mea sicut cremium aruerunt.\n5\u00a0Percussus sum ut f\u0153num, et aruit cor meum,\n quia oblitus sum comedere panem meum.\n6\u00a0A voce gemitus mei\n adh\u00e6sit os meum carni me\u00e6.\n7\u00a0Similis factus sum pellicano solitudinis;\n factus sum sicut nycticorax in domicilio.\n8\u00a0Vigilavi, et factus sum sicut passer solitarius in tecto.\n9\u00a0Tota die exprobrabant mihi inimici mei,\n et qui laudabant me adversum me jurabant:\n10\u00a0quia cinerem tamquam panem manducabam,\n et potum meum cum fletu miscebam,\n11\u00a0a facie ir\u00e6 et indignationis tu\u00e6:\n quia elevans allisisti me.\n12\u00a0Dies mei sicut umbra declinaverunt,\n et ego sicut f\u0153num arui.\n13\u00a0Tu autem, Domine, in \u00e6ternum permanes,\n et memoriale tuum in generationem et generationem.\n14\u00a0Tu exsurgens misereberis Sion,\n quia tempus miserendi ejus, quia venit tempus:\n15\u00a0quoniam placuerunt servis tuis lapides ejus,\n et terr\u00e6 ejus miserebuntur.\n16\u00a0Et timebunt gentes nomen tuum, Domine,\n et omnes reges terr\u00e6 gloriam tuam:\n17\u00a0quia \u00e6dificavit Dominus Sion,\n et videbitur in gloria sua.\n18\u00a0Respexit in orationem humilium\n et non sprevit precem eorum.\n19\u00a0Scribantur h\u00e6c in generatione altera,\n et populus qui creabitur laudabit Dominum.\n20\u00a0Quia prospexit de excelso sancto suo;\n Dominus de c\u00e6lo in terram aspexit:\n21\u00a0ut audiret gemitus compeditorum;\n ut solveret filios interemptorum:\n22\u00a0ut annuntient in Sion nomen Domini,\n et laudem ejus in Jerusalem:\n23\u00a0in conveniendo populos in unum, et reges,\n ut serviant Domino.\n24\u00a0Respondit ei in via virtutis su\u00e6:\n Paucitatem dierum meorum nuntia mihi:\n25\u00a0ne revoces me in dimidio dierum meorum,\n in generationem et generationem anni tui.\n26\u00a0Initio tu, Domine, terram fundasti,\n et opera manuum tuarum sunt c\u00e6li.\n27\u00a0Ipsi peribunt, tu autem permanes;\n et omnes sicut vestimentum veterascent.\n Et sicut opertorium mutabis eos, et mutabuntur;\n28\u00a0tu autem idem ipse es, et anni tui non deficient.\n29\u00a0Filii servorum tuorum habitabunt,\n et semen eorum in s\u00e6culum dirigetur.]","title":"Vulgate: Psalms: Psalms Chapter 101","type":"page"}