{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa102.htm","path":"bib/vul/psa102.htm","source_url":"https://sacred-texts.com/bib/vul/psa102.htm","text":"1\u00a0Ipsi David. [Benedic, anima mea, Domino,\n et omnia qu\u00e6 intra me sunt nomini sancto ejus.\n2\u00a0Benedic, anima mea, Domino,\n et noli oblivisci omnes retributiones ejus.\n3\u00a0Qui propitiatur omnibus iniquitatibus tuis;\n qui sanat omnes infirmitates tuas:\n4\u00a0qui redimit de interitu vitam tuam;\n qui coronat te in misericordia et miserationibus:\n5\u00a0qui replet in bonis desiderium tuum;\n renovabitur ut aquil\u00e6 juventus tua:\n6\u00a0faciens misericordias Dominus,\n et judicium omnibus injuriam patientibus.\n7\u00a0Notas fecit vias suas Moysi;\n filiis Isra\u00ebl voluntates suas.\n8\u00a0Miserator et misericors Dominus:\n longanimis, et multum misericors.\n9\u00a0Non in perpetuum irascetur,\n neque in \u00e6ternum comminabitur.\n10\u00a0Non secundum peccata nostra fecit nobis,\n neque secundum iniquitates nostras retribuit nobis.\n11\u00a0Quoniam secundum altitudinem c\u00e6li a terra,\n corroboravit misericordiam suam super timentes se;\n12\u00a0quantum distat ortus ab occidente,\n longe fecit a nobis iniquitates nostras.\n13\u00a0Quomodo miseretur pater filiorum,\n misertus est Dominus timentibus se.\n14\u00a0Quoniam ipse cognovit figmentum nostrum;\n recordatus est quoniam pulvis sumus.\n15\u00a0Homo, sicut f\u0153num dies ejus;\n tamquam flos agri, sic efflorebit:\n16\u00a0quoniam spiritus pertransibit in illo, et non subsistet,\n et non cognoscet amplius locum suum.\n17\u00a0Misericordia autem Domini ab \u00e6terno,\n et usque in \u00e6ternum super timentes eum.\n Et justitia illius in filios filiorum,\n18\u00a0his qui servant testamentum ejus,\n et memores sunt mandatorum ipsius ad faciendum ea.\n19\u00a0Dominus in c\u00e6lo paravit sedem suam,\n et regnum ipsius omnibus dominabitur.\n20\u00a0Benedicite Domino, omnes angeli ejus:\n potentes virtute, facientes verbum illius,\n ad audiendam vocem sermonum ejus.\n21\u00a0Benedicite Domino, omnes virtutes ejus;\n ministri ejus, qui facitis voluntatem ejus.\n22\u00a0Benedicite Domino, omnia opera ejus:\n in omni loco dominationis ejus,\n benedic, anima mea, Domino.]","title":"Vulgate: Psalms: Psalms Chapter 102","type":"page"}