{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa103.htm","path":"bib/vul/psa103.htm","source_url":"https://sacred-texts.com/bib/vul/psa103.htm","text":"1\u00a0Ipsi David. [Benedic, anima mea, Domino:\n Domine Deus meus, magnificatus es vehementer.\n Confessionem et decorem induisti,\n2\u00a0amictus lumine sicut vestimento.\n Extendens c\u00e6lum sicut pellem,\n3\u00a0qui tegis aquis superiora ejus:\n qui ponis nubem ascensum tuum;\n qui ambulas super pennas ventorum:\n4\u00a0qui facis angelos tuos spiritus,\n et ministros tuos ignem urentem.\n5\u00a0Qui fundasti terram super stabilitatem suam:\n non inclinabitur in s\u00e6culum s\u00e6culi.\n6\u00a0Abyssus sicut vestimentum amictus ejus;\n super montes stabunt aqu\u00e6.\n7\u00a0Ab increpatione tua fugient;\n a voce tonitrui tui formidabunt.\n8\u00a0Ascendunt montes, et descendunt campi,\n in locum quem fundasti eis.\n9\u00a0Terminum posuisti quem non transgredientur,\n neque convertentur operire terram.\n10\u00a0Qui emittis fontes in convallibus;\n inter medium montium pertransibunt aqu\u00e6.\n11\u00a0Potabunt omnes besti\u00e6 agri;\n expectabunt onagri in siti sua.\n12\u00a0Super ea volucres c\u00e6li habitabunt;\n de medio petrarum dabunt voces.\n13\u00a0Rigans montes de superioribus suis;\n de fructu operum tuorum satiabitur terra:\n14\u00a0producens f\u0153num jumentis,\n et herbam servituti hominum,\n ut educas panem de terra,\n15\u00a0et vinum l\u00e6tificet cor hominis:\n ut exhilaret faciem in oleo,\n et panis cor hominis confirmet.\n16\u00a0Saturabuntur ligna campi,\n et cedri Libani quas plantavit:\n17\u00a0illic passeres nidificabunt:\n herodii domus dux est eorum.\n18\u00a0Montes excelsi cervis;\n petra refugium herinaciis.\n19\u00a0Fecit lunam in tempora;\n sol cognovit occasum suum.\n20\u00a0Posuisti tenebras, et facta est nox;\n in ipsa pertransibunt omnes besti\u00e6 silv\u00e6:\n21\u00a0catuli leonum rugientes ut rapiant,\n et qu\u00e6rant a Deo escam sibi.\n22\u00a0Ortus est sol, et congregati sunt,\n et in cubilibus suis collocabuntur.\n23\u00a0Exibit homo ad opus suum,\n et ad operationem suam usque ad vesperum.\n24\u00a0Quam magnificata sunt opera tua, Domine!\n omnia in sapientia fecisti;\n impleta est terra possessione tua.\n25\u00a0Hoc mare magnum et spatiosum manibus;\n illic reptilia quorum non est numerus:\n animalia pusilla cum magnis.\n26\u00a0Illic naves pertransibunt;\n draco iste quem formasti ad illudendum ei.\n27\u00a0Omnia a te expectant\n ut des illis escam in tempore.\n28\u00a0Dante te illis, colligent;\n aperiente te manum tuam, omnia implebuntur bonitate.\n29\u00a0Avertente autem te faciem, turbabuntur;\n auferes spiritum eorum, et deficient,\n et in pulverem suum revertentur.\n30\u00a0Emittes spiritum tuum, et creabuntur,\n et renovabis faciem terr\u00e6.\n31\u00a0Sit gloria Domini in s\u00e6culum;\n l\u00e6tabitur Dominus in operibus suis.\n32\u00a0Qui respicit terram, et facit eam tremere;\n qui tangit montes, et fumigant.\n33\u00a0Cantabo Domino in vita mea;\n psallam Deo meo quamdiu sum.\n34\u00a0Jucundum sit ei eloquium meum;\n ego vero delectabor in Domino.\n35\u00a0Deficiant peccatores a terra,\n et iniqui, ita ut non sint.\n Benedic, anima mea, Domino.]","title":"Vulgate: Psalms: Psalms Chapter 103","type":"page"}