{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa105.htm","path":"bib/vul/psa105.htm","source_url":"https://sacred-texts.com/bib/vul/psa105.htm","text":"1\u00a0Alleluja. [Confitemini Domino, quoniam bonus,\n quoniam in s\u00e6culum misericordia ejus.\n2\u00a0Quis loquetur potentias Domini;\n auditas faciet omnes laudes ejus?\n3\u00a0Beati qui custodiunt judicium,\n et faciunt justitiam in omni tempore.\n4\u00a0Memento nostri, Domine, in beneplacito populi tui;\n visita nos in salutari tuo:\n5\u00a0ad videndum in bonitate electorum tuorum;\n ad l\u00e6tandum in l\u00e6titia gentis tu\u00e6:\n ut lauderis cum h\u00e6reditate tua.\n6\u00a0Peccavimus cum patribus nostris:\n injuste egimus; iniquitatem fecimus.\n7\u00a0Patres nostri in \u00c6gypto non intellexerunt mirabilia tua;\n non fuerunt memores multitudinis misericordi\u00e6 tu\u00e6.\n Et irritaverunt ascendentes in mare, mare Rubrum;\n8\u00a0et salvavit eos propter nomen suum,\n ut notam faceret potentiam suam.\n9\u00a0Et increpuit mare Rubrum et exsiccatum est,\n et deduxit eos in abyssis sicut in deserto.\n10\u00a0Et salvavit eos de manu odientium,\n et redemit eos de manu inimici.\n11\u00a0Et operuit aqua tribulantes eos;\n unus ex eis non remansit.\n12\u00a0Et crediderunt verbis ejus,\n et laudaverunt laudem ejus.\n13\u00a0Cito fecerunt; obliti sunt operum ejus:\n et non sustinuerunt consilium ejus.\n14\u00a0Et concupierunt concupiscentiam in deserto,\n et tentaverunt Deum in inaquoso.\n15\u00a0Et dedit eis petitionem ipsorum,\n et misit saturitatem in animas eorum.\n16\u00a0Et irritaverunt Moysen in castris;\n Aaron, sanctum Domini.\n17\u00a0Aperta est terra, et deglutivit Dathan,\n et operuit super congregationem Abiron.\n18\u00a0Et exarsit ignis in synagoga eorum:\n flamma combussit peccatores.\n19\u00a0Et fecerunt vitulum in Horeb,\n et adoraverunt sculptile.\n20\u00a0Et mutaverunt gloriam suam\n in similitudinem vituli comedentis f\u0153num.\n21\u00a0Obliti sunt Deum qui salvavit eos;\n qui fecit magnalia in \u00c6gypto,\n22\u00a0mirabilia in terra Cham,\n terribilia in mari Rubro.\n23\u00a0Et dixit ut disperderet eos,\n si non Moyses, electus ejus,\n stetisset in confractione in conspectu ejus,\n ut averteret iram ejus, ne disperderet eos.\n24\u00a0Et pro nihilo habuerunt terram desiderabilem;\n non crediderunt verbo ejus.\n25\u00a0Et murmuraverunt in tabernaculis suis;\n non exaudierunt vocem Domini.\n26\u00a0Et elevavit manum suam super eos\n ut prosterneret eos in deserto:\n27\u00a0et ut dejiceret semen eorum in nationibus,\n et dispergeret eos in regionibus.\n28\u00a0Et initiati sunt Beelphegor,\n et comederunt sacrificia mortuorum.\n29\u00a0Et irritaverunt eum in adinventionibus suis,\n et multiplicata est in eis ruina.\n30\u00a0Et stetit Phinees, et placavit,\n et cessavit quassatio.\n31\u00a0Et reputatum est ei in justitiam,\n in generationem et generationem usque in sempiternum.\n32\u00a0Et irritaverunt eum ad aquas contradictionis,\n et vexatus est Moyses propter eos:\n33\u00a0quia exacerbaverunt spiritum ejus,\n et distinxit in labiis suis.\n34\u00a0Non disperdiderunt gentes\n quas dixit Dominus illis:\n35\u00a0et commisti sunt inter gentes,\n et didicerunt opera eorum;\n36\u00a0et servierunt sculptilibus eorum,\n et factum est illis in scandalum.\n37\u00a0Et immolaverunt filios suos et filias suas d\u00e6moniis.\n38\u00a0Et effuderunt sanguinem innocentem,\n sanguinem filiorum suorum et filiarum suarum,\n quas sacrificaverunt sculptilibus Chanaan.\n Et infecta est terra in sanguinibus,\n39\u00a0et contaminata est in operibus eorum:\n et fornicati sunt in adinventionibus suis.\n40\u00a0Et iratus est furore Dominus in populum suum,\n et abominatus est h\u00e6reditatem suam.\n41\u00a0Et tradidit eos in manus gentium;\n et dominati sunt eorum qui oderunt eos.\n42\u00a0Et tribulaverunt eos inimici eorum,\n et humiliati sunt sub manibus eorum;\n43\u00a0s\u00e6pe liberavit eos.\n Ipsi autem exacerbaverunt eum in consilio suo,\n et humiliati sunt in iniquitatibus suis.\n44\u00a0Et vidit cum tribularentur,\n et audivit orationem eorum.\n45\u00a0Et memor fuit testamenti sui,\n et p\u0153nituit eum secundum multitudinem misericordi\u00e6 su\u00e6:\n46\u00a0et dedit eos in misericordias,\n in conspectu omnium qui ceperant eos.\n47\u00a0Salvos nos fac, Domine Deus noster,\n et congrega nos de nationibus:\n ut confiteamur nomini sancto tuo,\n et gloriemur in laude tua.\n48\u00a0Benedictus Dominus Deus Isra\u00ebl, a s\u00e6culo et usque in s\u00e6culum;\n et dicet omnis populus: Fiat, fiat.]","title":"Vulgate: Psalms: Psalms Chapter 105","type":"page"}