{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa106.htm","path":"bib/vul/psa106.htm","source_url":"https://sacred-texts.com/bib/vul/psa106.htm","text":"1\u00a0Alleluja. [Confitemini Domino, quoniam bonus,\n quoniam in s\u00e6culum misericordia ejus.\n2\u00a0Dicant qui redempti sunt a Domino,\n quos redemit de manu inimici,\n et de regionibus congregavit eos,\n3\u00a0a solis ortu, et occasu, ab aquilone, et mari.\n4\u00a0Erraverunt in solitudine, in inaquoso;\n viam civitatis habitaculi non invenerunt.\n5\u00a0Esurientes et sitientes,\n anima eorum in ipsis defecit.\n6\u00a0Et clamaverunt ad Dominum cum tribularentur,\n et de necessitatibus eorum eripuit eos;\n7\u00a0et deduxit eos in viam rectam,\n ut irent in civitatem habitationis.\n8\u00a0Confiteantur Domino misericordi\u00e6 ejus,\n et mirabilia ejus filiis hominum.\n9\u00a0Quia satiavit animam inanem,\n et animam esurientem satiavit bonis.\n10\u00a0Sedentes in tenebris et umbra mortis;\n vinctos in mendicitate et ferro.\n11\u00a0Quia exacerbaverunt eloquia Dei,\n et consilium Altissimi irritaverunt.\n12\u00a0Et humiliatum est in laboribus cor eorum;\n infirmati sunt, nec fuit qui adjuvaret.\n13\u00a0Et clamaverunt ad Dominum cum tribularentur;\n et de necessitatibus eorum liberavit eos.\n14\u00a0Et eduxit eos de tenebris et umbra mortis,\n et vincula eorum dirupit.\n15\u00a0Confiteantur Domino misericordi\u00e6 ejus,\n et mirabilia ejus filiis hominum.\n16\u00a0Quia contrivit portas \u00e6reas,\n et vectes ferreos confregit.\n17\u00a0Suscepit eos de via iniquitatis eorum;\n propter injustitias enim suas humiliati sunt.\n18\u00a0Omnem escam abominata est anima eorum,\n et appropinquaverunt usque ad portas mortis.\n19\u00a0Et clamaverunt ad Dominum cum tribularentur,\n et de necessitatibus eorum liberavit eos.\n20\u00a0Misit verbum suum, et sanavit eos,\n et eripuit eos de interitionibus eorum.\n21\u00a0Confiteantur Domino misericordi\u00e6 ejus,\n et mirabilia ejus filiis hominum.\n22\u00a0Et sacrificent sacrificium laudis,\n et annuntient opera ejus in exsultatione.\n23\u00a0Qui descendunt mare in navibus,\n facientes operationem in aquis multis:\n24\u00a0ipsi viderunt opera Domini,\n et mirabilia ejus in profundo.\n25\u00a0Dixit, et stetit spiritus procell\u00e6,\n et exaltati sunt fluctus ejus.\n26\u00a0Ascendunt usque ad c\u00e6los, et descendunt usque ad abyssos;\n anima eorum in malis tabescebat.\n27\u00a0Turbati sunt, et moti sunt sicut ebrius,\n et omnis sapientia eorum devorata est.\n28\u00a0Et clamaverunt ad Dominum cum tribularentur;\n et de necessitatibus eorum eduxit eos.\n29\u00a0Et statuit procellam ejus in auram,\n et siluerunt fluctus ejus.\n30\u00a0Et l\u00e6tati sunt quia siluerunt;\n et deduxit eos in portum voluntatis eorum.\n31\u00a0Confiteantur Domino misericordi\u00e6 ejus,\n et mirabilia ejus filiis hominum.\n32\u00a0Et exaltent eum in ecclesia plebis,\n et in cathedra seniorum laudent eum.\n33\u00a0Posuit flumina in desertum,\n et exitus aquarum in sitim;\n34\u00a0terram fructiferam in salsuginem,\n a malitia inhabitantium in ea.\n35\u00a0Posuit desertum in stagna aquarum,\n et terram sine aqua in exitus aquarum.\n36\u00a0Et collocavit illic esurientes,\n et constituerunt civitatem habitationis:\n37\u00a0et seminaverunt agros et plantaverunt vineas,\n et fecerunt fructum nativitatis.\n38\u00a0Et benedixit eis, et multiplicati sunt nimis;\n et jumenta eorum non minoravit.\n39\u00a0Et pauci facti sunt et vexati sunt,\n a tribulatione malorum et dolore.\n40\u00a0Effusa est contemptio super principes:\n et errare fecit eos in invio, et non in via.\n41\u00a0Et adjuvit pauperem de inopia,\n et posuit sicut oves familias.\n42\u00a0Videbunt recti, et l\u00e6tabuntur;\n et omnis iniquitas oppilabit os suum.\n43\u00a0Quis sapiens, et custodiet h\u00e6c,\n et intelliget misericordias Domini?]","title":"Vulgate: Psalms: Psalms Chapter 106","type":"page"}