{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa107.htm","path":"bib/vul/psa107.htm","source_url":"https://sacred-texts.com/bib/vul/psa107.htm","text":"1 Canticum Psalmi, ipsi David.\n2\u00a0[Paratum cor meum, Deus, paratum cor meum;\n cantabo, et psallam in gloria mea.\n3\u00a0Exsurge, gloria mea; exsurge, psalterium et cithara;\n exsurgam diluculo.\n4\u00a0Confitebor tibi in populis, Domine,\n et psallam tibi in nationibus:\n5\u00a0quia magna est super c\u00e6los misericordia tua,\n et usque ad nubes veritas tua.\n6\u00a0Exaltare super c\u00e6los, Deus,\n et super omnem terram gloria tua:\n7\u00a0ut liberentur dilecti tui.\n Salvum fac dextera tua, et exaudi me.\n8\u00a0Deus locutus est in sancto suo:\n Exsultabo, et dividam Sichimam;\n et convallem tabernaculorum dimetiar.\n9\u00a0Meus est Galaad, et meus est Manasses,\n et Ephraim susceptio capitis mei.\n Juda rex meus;\n10\u00a0Moab lebes spei me\u00e6:\n in Idum\u00e6am extendam calceamentum meum;\n mihi alienigen\u00e6 amici facti sunt.\n11\u00a0Quis deducet me in civitatem munitam?\n quis deducet me usque in Idum\u00e6am?\n12\u00a0nonne tu, Deus, qui repulisti nos?\n et non exibis, Deus, in virtutibus nostris?\n13\u00a0Da nobis auxilium de tribulatione,\n quia vana salus hominis.\n14\u00a0In Deo faciemus virtutem;\n et ipse ad nihilum deducet inimicos nostros.]","title":"Vulgate: Psalms: Psalms Chapter 107","type":"page"}