{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa110.htm","path":"bib/vul/psa110.htm","source_url":"https://sacred-texts.com/bib/vul/psa110.htm","text":"1\u00a0Alleluja. [Confitebor tibi, Domine, in toto corde meo,\n in consilio justorum, et congregatione.\n2\u00a0Magna opera Domini:\n exquisita in omnes voluntates ejus.\n3\u00a0Confessio et magnificentia opus ejus,\n et justitia ejus manet in s\u00e6culum s\u00e6culi.\n4\u00a0Memoriam fecit mirabilium suorum,\n misericors et miserator Dominus.\n5\u00a0Escam dedit timentibus se;\n memor erit in s\u00e6culum testamenti sui.\n6\u00a0Virtutem operum suorum annuntiabit populo suo,\n7\u00a0ut det illis h\u00e6reditatem gentium.\n Opera manuum ejus veritas et judicium.\n8\u00a0Fidelia omnia mandata ejus,\n confirmata in s\u00e6culum s\u00e6culi,\n facta in veritate et \u00e6quitate.\n9\u00a0Redemptionem misit populo suo;\n mandavit in \u00e6ternum testamentum suum.\n Sanctum et terribile nomen ejus.\n10\u00a0Initium sapienti\u00e6 timor Domini;\n intellectus bonus omnibus facientibus eum:\n laudatio ejus manet in s\u00e6culum s\u00e6culi.]","title":"Vulgate: Psalms: Psalms Chapter 110","type":"page"}