{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa111.htm","path":"bib/vul/psa111.htm","source_url":"https://sacred-texts.com/bib/vul/psa111.htm","text":"1\u00a0Alleluja, reversionis Agg\u00e6i et Zachari\u00e6. [Beatus vir qui timet Dominum:\n in mandatis ejus volet nimis.\n2\u00a0Potens in terra erit semen ejus;\n generatio rectorum benedicetur.\n3\u00a0Gloria et diviti\u00e6 in domo ejus,\n et justitia ejus manet in s\u00e6culum s\u00e6culi.\n4\u00a0Exortum est in tenebris lumen rectis:\n misericors, et miserator, et justus.\n5\u00a0Jucundus homo qui miseretur et commodat;\n disponet sermones suos in judicio:\n6\u00a0quia in \u00e6ternum non commovebitur.\n7\u00a0In memoria \u00e6terna erit justus;\n ab auditione mala non timebit.\n Paratum cor ejus sperare in Domino,\n8\u00a0confirmatum est cor ejus;\n non commovebitur donec despiciat inimicos suos.\n9\u00a0Dispersit, dedit pauperibus;\n justitia ejus manet in s\u00e6culum s\u00e6culi:\n cornu ejus exaltabitur in gloria.\n10\u00a0Peccator videbit, et irascetur;\n dentibus suis fremet et tabescet:\n desiderium peccatorum peribit.]","title":"Vulgate: Psalms: Psalms Chapter 111","type":"page"}