{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa117.htm","path":"bib/vul/psa117.htm","source_url":"https://sacred-texts.com/bib/vul/psa117.htm","text":"1\u00a0Alleluja. [Confitemini Domino, quoniam bonus,\n quoniam in s\u00e6culum misericordia ejus.\n2\u00a0Dicat nunc Isra\u00ebl: Quoniam bonus,\n quoniam in s\u00e6culum misericordia ejus.\n3\u00a0Dicat nunc domus Aaron:\n Quoniam in s\u00e6culum misericordia ejus.\n4\u00a0Dicant nunc qui timent Dominum:\n Quoniam in s\u00e6culum misericordia ejus.\n5\u00a0De tribulatione invocavi Dominum,\n et exaudivit me in latitudine Dominus.\n6\u00a0Dominus mihi adjutor;\n non timebo quid faciat mihi homo.\n7\u00a0Dominus mihi adjutor,\n et ego despiciam inimicos meos.\n8\u00a0Bonum est confidere in Domino,\n quam confidere in homine.\n9\u00a0Bonum est sperare in Domino,\n quam sperare in principibus.\n10\u00a0Omnes gentes circuierunt me,\n et in nomine Domini, quia ultus sum in eos.\n11\u00a0Circumdantes circumdederunt me,\n et in nomine Domini, quia ultus sum in eos.\n12\u00a0Circumdederunt me sicut apes,\n et exarserunt sicut ignis in spinis:\n et in nomine Domini, quia ultus sum in eos.\n13\u00a0Impulsus eversus sum, ut caderem,\n et Dominus suscepit me.\n14\u00a0Fortitudo mea et laus mea Dominus,\n et factus est mihi in salutem.\n15\u00a0Vox exsultationis et salutis\n in tabernaculis justorum.\n16\u00a0Dextera Domini fecit virtutem;\n dextera Domini exaltavit me:\n dextera Domini fecit virtutem.\n17\u00a0Non moriar, sed vivam,\n et narrabo opera Domini.\n18\u00a0Castigans castigavit me Dominus,\n et morti non tradidit me.\n19\u00a0Aperite mihi portas justiti\u00e6:\n ingressus in eas confitebor Domino.\n20\u00a0H\u00e6c porta Domini:\n justi intrabunt in eam.\n21\u00a0Confitebor tibi quoniam exaudisti me,\n et factus es mihi in salutem.\n22\u00a0Lapidem quem reprobaverunt \u00e6dificantes,\n hic factus est in caput anguli.\n23\u00a0A Domino factum est istud,\n et est mirabile in oculis nostris.\n24\u00a0H\u00e6c est dies quam fecit Dominus;\n exsultemus, et l\u00e6temur in ea.\n25\u00a0O Domine, salvum me fac;\n o Domine, bene prosperare.\n26\u00a0Benedictus qui venit in nomine Domini:\n benediximus vobis de domo Domini.\n27\u00a0Deus Dominus, et illuxit nobis.\n Constituite diem solemnem in condensis,\n usque ad cornu altaris.\n28\u00a0Deus meus es tu, et confitebor tibi;\n Deus meus es tu, et exaltabo te.\n Confitebor tibi quoniam exaudisti me,\n et factus es mihi in salutem.\n29\u00a0Confitemini Domino, quoniam bonus,\n quoniam in s\u00e6culum misericordia ejus.]","title":"Vulgate: Psalms: Psalms Chapter 117","type":"page"}