{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa120.htm","path":"bib/vul/psa120.htm","source_url":"https://sacred-texts.com/bib/vul/psa120.htm","text":"1\u00a0Canticum graduum. [Levavi oculos meos in montes,\n unde veniet auxilium mihi.\n2\u00a0Auxilium meum a Domino,\n qui fecit c\u00e6lum et terram.\n3\u00a0Non det in commotionem pedem tuum,\n neque dormitet qui custodit te.\n4\u00a0Ecce non dormitabit neque dormiet\n qui custodit Isra\u00ebl.\n5\u00a0Dominus custodit te;\n Dominus protectio tua super manum dexteram tuam.\n6\u00a0Per diem sol non uret te,\n neque luna per noctem.\n7\u00a0Dominus custodit te ab omni malo;\n custodiat animam tuam Dominus.\n8\u00a0Dominus custodiat introitum tuum et exitum tuum,\n ex hoc nunc et usque in s\u00e6culum.]","title":"Vulgate: Psalms: Psalms Chapter 120","type":"page"}