{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa126.htm","path":"bib/vul/psa126.htm","source_url":"https://sacred-texts.com/bib/vul/psa126.htm","text":"1\u00a0Canticum graduum Salomonis. [Nisi Dominus \u00e6dificaverit domum,\n in vanum laboraverunt qui \u00e6dificant eam.\n Nisi Dominus custodierit civitatem,\n frustra vigilat qui custodit eam.\n2\u00a0Vanum est vobis ante lucem surgere:\n surgite postquam sederitis,\n qui manducatis panem doloris.\n Cum dederit dilectis suis somnum,\n3\u00a0ecce h\u00e6reditas Domini, filii;\n merces, fructus ventris.\n4\u00a0Sicut sagitt\u00e6 in manu potentis,\n ita filii excussorum.\n5\u00a0Beatus vir qui implevit desiderium suum ex ipsis:\n non confundetur cum loquetur inimicis suis in porta.]","title":"Vulgate: Psalms: Psalms Chapter 126","type":"page"}