{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa131.htm","path":"bib/vul/psa131.htm","source_url":"https://sacred-texts.com/bib/vul/psa131.htm","text":"1\u00a0Canticum graduum. [Memento, Domine, David,\n et omnis mansuetudinis ejus:\n2\u00a0sicut juravit Domino;\n votum vovit Deo Jacob:\n3\u00a0Si introiero in tabernaculum domus me\u00e6;\n si ascendero in lectum strati mei;\n4\u00a0si dedero somnum oculis meis,\n et palpebris meis dormitationem,\n5\u00a0et requiem temporibus meis,\n donec inveniam locum Domino,\n tabernaculum Deo Jacob.\n6\u00a0Ecce audivimus eam in Ephrata;\n invenimus eam in campis silv\u00e6.\n7\u00a0Introibimus in tabernaculum ejus;\n adorabimus in loco ubi steterunt pedes ejus.\n8\u00a0Surge, Domine, in requiem tuam,\n tu et arca sanctificationis tu\u00e6.\n9\u00a0Sacerdotes tui induantur justitiam,\n et sancti tui exsultent.\n10\u00a0Propter David servum tuum\n non avertas faciem christi tui.\n11\u00a0Juravit Dominus David veritatem,\n et non frustrabitur eam:\n De fructu ventris tui\n ponam super sedem tuam.\n12\u00a0Si custodierint filii tui testamentum meum,\n et testimonia mea h\u00e6c qu\u00e6 docebo eos,\n et filii eorum usque in s\u00e6culum\n sedebunt super sedem tuam.\n13\u00a0Quoniam elegit Dominus Sion:\n elegit eam in habitationem sibi.\n14\u00a0H\u00e6c requies mea in s\u00e6culum s\u00e6culi;\n hic habitabo, quoniam elegi eam.\n15\u00a0Viduam ejus benedicens benedicam;\n pauperes ejus saturabo panibus.\n16\u00a0Sacerdotes ejus induam salutari,\n et sancti ejus exsultatione exsultabunt.\n17\u00a0Illuc producam cornu David;\n paravi lucernam christo meo.\n18\u00a0Inimicos ejus induam confusione;\n super ipsum autem efflorebit sanctificatio mea.]","title":"Vulgate: Psalms: Psalms Chapter 131","type":"page"}