{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa136.htm","path":"bib/vul/psa136.htm","source_url":"https://sacred-texts.com/bib/vul/psa136.htm","text":"1\u00a0Psalmus David, Jeremi\u00e6. [Super flumina Babylonis illic sedimus et flevimus,\n cum recordaremur Sion.\n2\u00a0In salicibus in medio ejus\n suspendimus organa nostra:\n3\u00a0quia illic interrogaverunt nos, qui captivos duxerunt nos,\n verba cantionum;\n et qui abduxerunt nos:\n Hymnum cantate nobis de canticis Sion.\n4\u00a0Quomodo cantabimus canticum Domini\n in terra aliena?\n5\u00a0Si oblitus fuero tui, Jerusalem,\n oblivioni detur dextera mea.\n6\u00a0Adh\u00e6reat lingua mea faucibus meis,\n si non meminero tui;\n si non proposuero Jerusalem\n in principio l\u00e6titi\u00e6 me\u00e6.\n7\u00a0Memor esto, Domine, filiorum Edom,\n in die Jerusalem:\n qui dicunt: Exinanite, exinanite\n usque ad fundamentum in ea.\n8\u00a0Filia Babylonis misera! beatus qui retribuet tibi\n retributionem tuam quam retribuisti nobis.\n9\u00a0Beatus qui tenebit,\n et allidet parvulos tuos ad petram.]","title":"Vulgate: Psalms: Psalms Chapter 136","type":"page"}