{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa139.htm","path":"bib/vul/psa139.htm","source_url":"https://sacred-texts.com/bib/vul/psa139.htm","text":"1 In finem. Psalmus David.\n2\u00a0[Eripe me, Domine, ab homine malo;\n a viro iniquo eripe me.\n3\u00a0Qui cogitaverunt iniquitates in corde,\n tota die constituebant pr\u00e6lia.\n4\u00a0Acuerunt linguas suas sicut serpentis;\n venenum aspidum sub labiis eorum.\n5\u00a0Custodi me, Domine, de manu peccatoris,\n et ab hominibus iniquis eripe me.\n Qui cogitaverunt supplantare gressus meos:\n6\u00a0absconderunt superbi laqueum mihi.\n Et funes extenderunt in laqueum;\n juxta iter, scandalum posuerunt mihi.\n7\u00a0Dixi Domino: Deus meus es tu;\n exaudi, Domine, vocem deprecationis me\u00e6.\n8\u00a0Domine, Domine, virtus salutis me\u00e6,\n obumbrasti super caput meum in die belli.\n9\u00a0Ne tradas me, Domine, a desiderio meo peccatori:\n cogitaverunt contra me;\n ne derelinquas me, ne forte exaltentur.\n10\u00a0Caput circuitus eorum:\n labor labiorum ipsorum operiet eos.\n11\u00a0Cadent super eos carbones;\n in ignem dejicies eos:\n in miseriis non subsistent.\n12\u00a0Vir linguosus non dirigetur in terra;\n virum injustum mala capient in interitu.\n13\u00a0Cognovi quia faciet Dominus judicium inopis,\n et vindictam pauperum.\n14\u00a0Verumtamen justi confitebuntur nomini tuo,\n et habitabunt recti cum vultu tuo.]","title":"Vulgate: Psalms: Psalms Chapter 139","type":"page"}