{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa141.htm","path":"bib/vul/psa141.htm","source_url":"https://sacred-texts.com/bib/vul/psa141.htm","text":"1 Intellectus David, cum esset in spelunca, oratio.\n2\u00a0[Voce mea ad Dominum clamavi,\n voce mea ad Dominum deprecatus sum.\n3\u00a0Effundo in conspectu ejus orationem meam,\n et tribulationem meam ante ipsum pronuntio:\n4\u00a0in deficiendo ex me spiritum meum,\n et tu cognovisti semitas meas.\n In via hac qua ambulabam\n absconderunt laqueum mihi.\n5\u00a0Considerabam ad dexteram, et videbam,\n et non erat qui cognosceret me:\n periit fuga a me,\n et non est qui requirat animam meam.\n6\u00a0Clamavi ad te, Domine;\n dixi: Tu es spes mea,\n portio mea in terra viventium.\n7\u00a0Intende ad deprecationem meam,\n quia humiliatus sum nimis.\n Libera me a persequentibus me,\n quia confortati sunt super me.\n8\u00a0Educ de custodia animam meam\n ad confitendum nomini tuo;\n me exspectant justi donec retribuas mihi.]","title":"Vulgate: Psalms: Psalms Chapter 141","type":"page"}