{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa142.htm","path":"bib/vul/psa142.htm","source_url":"https://sacred-texts.com/bib/vul/psa142.htm","text":"1\u00a0Psalmus David, quando persequebatur eum Absalom filius ejus. [Domine, exaudi orationem meam;\n auribus percipe obsecrationem meam in veritate tua;\n exaudi me in tua justitia.\n2\u00a0Et non intres in judicium cum servo tuo,\n quia non justificabitur in conspectu tuo omnis vivens.\n3\u00a0Quia persecutus est inimicus animam meam;\n humiliavit in terra vitam meam;\n collocavit me in obscuris, sicut mortuos s\u00e6culi.\n4\u00a0Et anxiatus est super me spiritus meus;\n in me turbatum est cor meum.\n5\u00a0Memor fui dierum antiquorum;\n meditatus sum in omnibus operibus tuis:\n in factis manuum tuarum meditabar.\n6\u00a0Expandi manus meas ad te;\n anima mea sicut terra sine aqua tibi.\n7\u00a0Velociter exaudi me, Domine;\n defecit spiritus meus.\n Non avertas faciem tuam a me,\n et similis ero descendentibus in lacum.\n8\u00a0Auditam fac mihi mane misericordiam tuam,\n quia in te speravi.\n Notam fac mihi viam in qua ambulem,\n quia ad te levavi animam meam.\n9\u00a0Eripe me de inimicis meis, Domine:\n ad te confugi.\n10\u00a0Doce me facere voluntatem tuam,\n quia Deus meus es tu.\n Spiritus tuus bonus deducet me in terram rectam.\n11\u00a0Propter nomen tuum, Domine, vivificabis me:\n in \u00e6quitate tua, educes de tribulatione animam meam,\n12\u00a0et in misericordia tua disperdes inimicos meos,\n et perdes omnes qui tribulant animam meam,\n quoniam ego servus tuus sum.]","title":"Vulgate: Psalms: Psalms Chapter 142","type":"page"}