{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa143.htm","path":"bib/vul/psa143.htm","source_url":"https://sacred-texts.com/bib/vul/psa143.htm","text":"1\u00a0Psalmus David. Adversus Goliath. [Benedictus Dominus Deus meus,\n qui docet manus meas ad pr\u00e6lium,\n et digitos meos ad bellum.\n2\u00a0Misericordia mea et refugium meum;\n susceptor meus et liberator meus;\n protector meus, et in ipso speravi,\n qui subdit populum meum sub me.\n3\u00a0Domine, quid est homo, quia innotuisti ei?\n aut filius hominis, quia reputas eum?\n4\u00a0Homo vanitati similis factus est;\n dies ejus sicut umbra pr\u00e6tereunt.\n5\u00a0Domine, inclina c\u00e6los tuos, et descende;\n tange montes, et fumigabunt.\n6\u00a0Fulgura coruscationem, et dissipabis eos;\n emitte sagittas tuas, et conturbabis eos.\n7\u00a0Emitte manum tuam de alto: eripe me,\n et libera me de aquis multis,\n de manu filiorum alienorum:\n8\u00a0quorum os locutum est vanitatem,\n et dextera eorum dextera iniquitatis.\n9\u00a0Deus, canticum novum cantabo tibi;\n in psalterio decachordo psallam tibi.\n10\u00a0Qui das salutem regibus,\n qui redemisti David servum tuum de gladio maligno,\n11\u00a0eripe me, et erue me de manu filiorum alienorum,\n quorum os locutum est vanitatem,\n et dextera eorum dextera iniquitatis.\n12\u00a0Quorum filii sicut novell\u00e6 plantationes in juventute sua;\n fili\u00e6 eorum composit\u00e6,\n circumornat\u00e6 ut similitudo templi.\n13\u00a0Promptuaria eorum plena, eructantia ex hoc in illud;\n oves eorum f\u0153tos\u00e6, abundantes in egressibus suis;\n14\u00a0boves eorum crass\u00e6.\n Non est ruina maceri\u00e6, neque transitus,\n neque clamor in plateis eorum.\n15\u00a0Beatum dixerunt populum cui h\u00e6c sunt;\n beatus populus cujus Dominus Deus ejus.]","title":"Vulgate: Psalms: Psalms Chapter 143","type":"page"}