{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa144.htm","path":"bib/vul/psa144.htm","source_url":"https://sacred-texts.com/bib/vul/psa144.htm","text":"1\u00a0Laudatio ipsi David. [Exaltabo te, Deus meus rex,\n et benedicam nomini tuo in s\u00e6culum, et in s\u00e6culum s\u00e6culi.\n2\u00a0Per singulos dies benedicam tibi,\n et laudabo nomen tuum in s\u00e6culum, et in s\u00e6culum s\u00e6culi.\n3\u00a0Magnus Dominus, et laudabilis nimis,\n et magnitudinis ejus non est finis.\n4\u00a0Generatio et generatio laudabit opera tua,\n et potentiam tuam pronuntiabunt.\n5\u00a0Magnificentiam glori\u00e6 sanctitatis tu\u00e6 loquentur,\n et mirabilia tua narrabunt.\n6\u00a0Et virtutem terribilium tuorum dicent,\n et magnitudinem tuam narrabunt.\n7\u00a0Memoriam abundanti\u00e6 suavitatis tu\u00e6 eructabunt,\n et justitia tua exsultabunt.\n8\u00a0Miserator et misericors Dominus:\n patiens, et multum misericors.\n9\u00a0Suavis Dominus universis,\n et miserationes ejus super omnia opera ejus.\n10\u00a0Confiteantur tibi, Domine, omnia opera tua,\n et sancti tui benedicant tibi.\n11\u00a0Gloriam regni tui dicent,\n et potentiam tuam loquentur:\n12\u00a0ut notam faciant filiis hominum potentiam tuam,\n et gloriam magnificenti\u00e6 regni tui.\n13\u00a0Regnum tuum regnum omnium s\u00e6culorum;\n et dominatio tua in omni generatione et generationem.\n Fidelis Dominus in omnibus verbis suis,\n et sanctus in omnibus operibus suis.\n14\u00a0Allevat Dominus omnes qui corruunt,\n et erigit omnes elisos.\n15\u00a0Oculi omnium in te sperant, Domine,\n et tu das escam illorum in tempore opportuno.\n16\u00a0Aperis tu manum tuam,\n et imples omne animal benedictione.\n17\u00a0Justus Dominus in omnibus viis suis,\n et sanctus in omnibus operibus suis.\n18\u00a0Prope est Dominus omnibus invocantibus eum,\n omnibus invocantibus eum in veritate.\n19\u00a0Voluntatem timentium se faciet,\n et deprecationem eorum exaudiet, et salvos faciet eos.\n20\u00a0Custodit Dominus omnes diligentes se,\n et omnes peccatores disperdet.\n21\u00a0Laudationem Domini loquetur os meum;\n et benedicat omnis caro nomini sancto ejus in s\u00e6culum, et in s\u00e6culum s\u00e6culi.]","title":"Vulgate: Psalms: Psalms Chapter 144","type":"page"}