{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa146.htm","path":"bib/vul/psa146.htm","source_url":"https://sacred-texts.com/bib/vul/psa146.htm","text":"1\u00a0Alleluja. [Laudate Dominum, quoniam bonus est psalmus;\n Deo nostro sit jucunda, decoraque laudatio.\n2\u00a0\u00c6dificans Jerusalem Dominus,\n dispersiones Isra\u00eblis congregabit:\n3\u00a0qui sanat contritos corde,\n et alligat contritiones eorum;\n4\u00a0qui numerat multitudinem stellarum,\n et omnibus eis nomina vocat.\n5\u00a0Magnus Dominus noster, et magna virtus ejus,\n et sapienti\u00e6 ejus non est numerus.\n6\u00a0Suscipiens mansuetos Dominus;\n humilians autem peccatores usque ad terram.\n7\u00a0Pr\u00e6cinite Domino in confessione;\n psallite Deo nostro in cithara.\n8\u00a0Qui operit c\u00e6lum nubibus,\n et parat terr\u00e6 pluviam;\n qui producit in montibus f\u0153num,\n et herbam servituti hominum;\n9\u00a0qui dat jumentis escam ipsorum,\n et pullis corvorum invocantibus eum.\n10\u00a0Non in fortitudine equi voluntatem habebit,\n nec in tibiis viri beneplacitum erit ei.\n11\u00a0Beneplacitum est Domino super timentes eum,\n et in eis qui sperant super misericordia ejus.]","title":"Vulgate: Psalms: Psalms Chapter 146","type":"page"}