{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa147.htm","path":"bib/vul/psa147.htm","source_url":"https://sacred-texts.com/bib/vul/psa147.htm","text":"1\u00a0Alleluja. [Lauda, Jerusalem, Dominum;\n lauda Deum tuum, Sion.\n2\u00a0Quoniam confortavit seras portarum tuarum;\n benedixit filiis tuis in te.\n3\u00a0Qui posuit fines tuos pacem,\n et adipe frumenti satiat te.\n4\u00a0Qui emittit eloquium suum terr\u00e6:\n velociter currit sermo ejus.\n5\u00a0Qui dat nivem sicut lanam;\n nebulam sicut cinerem spargit.\n6\u00a0Mittit crystallum suam sicut buccellas:\n ante faciem frigoris ejus quis sustinebit?\n7\u00a0Emittet verbum suum, et liquefaciet ea;\n flabit spiritus ejus, et fluent aqu\u00e6.\n8\u00a0Qui annuntiat verbum suum Jacob,\n justitias et judicia sua Isra\u00ebl.\n9\u00a0Non fecit taliter omni nationi,\n et judicia sua non manifestavit eis.\n Alleluja.]","title":"Vulgate: Psalms: Psalms Chapter 147","type":"page"}