{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa148.htm","path":"bib/vul/psa148.htm","source_url":"https://sacred-texts.com/bib/vul/psa148.htm","text":"1\u00a0Alleluja. [Laudate Dominum de c\u00e6lis;\n laudate eum in excelsis.\n2\u00a0Laudate eum, omnes angeli ejus;\n laudate eum, omnes virtutes ejus.\n3\u00a0Laudate eum, sol et luna;\n laudate eum, omnes stell\u00e6 et lumen.\n4\u00a0Laudate eum, c\u00e6li c\u00e6lorum;\n et aqu\u00e6 omnes qu\u00e6 super c\u00e6los sunt,\n5\u00a0laudent nomen Domini.\n Quia ipse dixit, et facta sunt;\n ipse mandavit, et creata sunt.\n6\u00a0Statuit ea in \u00e6ternum, et in s\u00e6culum s\u00e6culi;\n pr\u00e6ceptum posuit, et non pr\u00e6teribit.\n7\u00a0Laudate Dominum de terra,\n dracones et omnes abyssi;\n8\u00a0ignis, grando, nix, glacies, spiritus procellarum,\n qu\u00e6 faciunt verbum ejus;\n9\u00a0montes, et omnes colles;\n ligna fructifera, et omnes cedri;\n10\u00a0besti\u00e6, et universa pecora;\n serpentes, et volucres pennat\u00e6;\n11\u00a0reges terr\u00e6 et omnes populi;\n principes et omnes judices terr\u00e6;\n12\u00a0juvenes et virgines; senes cum junioribus,\n laudent nomen Domini:\n13\u00a0quia exaltatum est nomen ejus solius.\n14\u00a0Confessio ejus super c\u00e6lum et terram;\n et exaltavit cornu populi sui.\n Hymnus omnibus sanctis ejus;\n filiis Isra\u00ebl, populo appropinquanti sibi.\n Alleluja.]","title":"Vulgate: Psalms: Psalms Chapter 148","type":"page"}