{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa149.htm","path":"bib/vul/psa149.htm","source_url":"https://sacred-texts.com/bib/vul/psa149.htm","text":"1\u00a0Alleluja. [Cantate Domino canticum novum;\n laus ejus in ecclesia sanctorum.\n2\u00a0L\u00e6tetur Isra\u00ebl in eo qui fecit eum,\n et filii Sion exsultent in rege suo.\n3\u00a0Laudent nomen ejus in choro;\n in tympano et psalterio psallant ei.\n4\u00a0Quia beneplacitum est Domino in populo suo,\n et exaltabit mansuetos in salutem.\n5\u00a0Exsultabunt sancti in gloria;\n l\u00e6tabuntur in cubilibus suis.\n6\u00a0Exaltationes Dei in gutture eorum,\n et gladii ancipites in manibus eorum:\n7\u00a0ad faciendam vindictam in nationibus,\n increpationes in populis;\n8\u00a0ad alligandos reges eorum in compedibus,\n et nobiles eorum in manicis ferreis;\n9\u00a0ut faciant in eis judicium conscriptum:\n gloria h\u00e6c est omnibus sanctis ejus.\n Alleluja.]","title":"Vulgate: Psalms: Psalms Chapter 149","type":"page"}