{"collection":"Bible & Christianity","html_url":"https://unchartedknowledge.5gfusion.net/browse/bib/vul/rev001.htm","path":"bib/vul/rev001.htm","source_url":"https://sacred-texts.com/bib/vul/rev001.htm","text":"1 Apocalypsis Jesu Christi, quam dedit illi Deus palam facere servis suis, qu\u00e6 oportet fieri cito: et significavit, mittens per angelum suum servo suo Joanni,\n2 qui testimonium perhibuit verbo Dei, et testimonium Jesu Christi, qu\u00e6cumque vidit.\n3\u00a0Beatus qui legit, et audit verba propheti\u00e6 hujus, et servat ea, qu\u00e6 in ea scripta sunt: tempus enim prope est.\n \n4 Joannes septem ecclesiis, qu\u00e6 sunt in Asia. Gratia vobis, et pax ab eo, qui est, et qui erat, et qui venturus est: et a septem spiritibus qui in conspectu throni ejus sunt:\n5 et a Jesu Christo, qui est testis fidelis, primogenitus mortuorum, et princeps regum terr\u00e6, qui dilexit nos, et lavit nos a peccatis nostris in sanguine suo,\n6 et fecit nos regnum, et sacerdotes Deo et Patri suo: ipsi gloria et imperium in s\u00e6cula s\u00e6culorum. Amen.\n7 Ecce venit cum nubibus, et videbit eum omnis oculus, et qui eum pupugerunt. Et plangent se super eum omnes tribus terr\u00e6. Etiam: amen.\n8\u00a0Ego sum alpha et omega, principium et finis, dicit Dominus Deus: qui est, et qui erat, et qui venturus est, omnipotens.\n \n9 Ego Joannes frater vester, et particeps in tribulatione, et regno, et patientia in Christo Jesu: fui in insula, qu\u00e6 appellatur Patmos, propter verbum Dei, et testimonium Jesu:\n10 fui in spiritu in dominica die, et audivi post me vocem magnam tamquam tub\u00e6,\n11 dicentis: Quod vides, scribe in libro: et mitte septem ecclesiis, qu\u00e6 sunt in Asia, Epheso, et Smyrn\u00e6, et Pergamo, et Thyatir\u00e6, et Sardis, et Philadelphi\u00e6, et Laodici\u00e6.\n12 Et conversus sum ut viderem vocem, qu\u00e6 loquebatur mecum: et conversus vidi septem candelabra aurea:\n13 et in medio septem candelabrorum aureorum, similem Filio hominis vestitum podere, et pr\u00e6cinctum ad mamillas zona aurea:\n14 caput autem ejus, et capilli erant candidi tamquam lana alba, et tamquam nix, et oculi ejus tamquam flamma ignis:\n15 et pedes ejus similes auricalco, sicut in camino ardenti, et vox illius tamquam vox aquarum multarum:\n16 et habebat in dextera sua stellas septem: et de ore ejus gladius utraque parte acutus exibat: et facies ejus sicut sol lucet in virtute sua.\n17 Et cum vidissem eum, cecidi ad pedes ejus tamquam mortuus. Et posuit dexteram suam super me, dicens: Noli timere: ego sum primus, et novissimus,\n18 et vivus, et fui mortuus, et ecce sum vivens in s\u00e6cula s\u00e6culorum: et habeo claves mortis, et inferni.\n19 Scribe ergo qu\u00e6 vidisti, et qu\u00e6 sunt, et qu\u00e6 oportet fieri post h\u00e6c.\n20 Sacramentum septem stellarum, quas vidisti in dextera mea, et septem candelabra aurea: septem stell\u00e6, angeli sunt septem ecclesiarum: et candelabra septem, septem ecclesi\u00e6 sunt.","title":"Vulgate: Revelation: Revelation Chapter 1","type":"page"}