{"collection":"Bible & Christianity","html_url":"https://unchartedknowledge.5gfusion.net/browse/bib/vul/rev004.htm","path":"bib/vul/rev004.htm","source_url":"https://sacred-texts.com/bib/vul/rev004.htm","text":"1 Post h\u00e6c vidi: et ecce ostium apertum in c\u00e6lo, et vox prima, quam audivi tamquam tub\u00e6 loquentis mecum, dicens: Ascende huc, et ostendam tibi qu\u00e6 oportet fieri post h\u00e6c.\n2 Et statim fui in spiritu: et ecce sedes posita erat in c\u00e6lo, et supra sedem sedens.\n3 Et qui sedebat similis erat aspectui lapidis jaspidis, et sardinis: et iris erat in circuitu sedis similis visioni smaragdin\u00e6.\n4 Et in circuitu sedis sedilia viginti quatuor: et super thronos viginti quatuor seniores sedentes, circumamicti vestimentis albis, et in capitibus eorum coron\u00e6 aure\u00e6.\n5 Et de throno procedebant fulgura, et voces, et tonitrua: et septem lampades ardentes ante thronum, qui sunt septem spiritus Dei.\n6 Et in conspectu sedis tamquam mare vitreum simile crystallo: et in medio sedis, et in circuitu sedis quatuor animalia plena oculis ante et retro.\n7 Et animal primum simile leoni, et secundum animal simile vitulo, et tertium animal habens faciem quasi hominis, et quartum animal simile aquil\u00e6 volanti.\n8 Et quatuor animalia, singula eorum habebant alas senas: et in circuitu, et intus plena sunt oculis: et requiem non habebant die ac nocte, dicentia: Sanctus, Sanctus, Sanctus Dominus Deus omnipotens, qui erat, et qui est, et qui venturus est.\n9 Et cum darent illa animalia gloriam, et honorem, et benedictionem sedenti super thronum, viventi in s\u00e6cula s\u00e6culorum,\n10 procidebant viginti quatuor seniores ante sedentem in throno, et adorabant viventem in s\u00e6cula s\u00e6culorum, et mittebant coronas suas ante thronum, dicentes:\n11 Dignus es Domine Deus noster accipere gloriam, et honorem, et virtutem: quia tu creasti omnia, et propter voluntatem tuam erant, et creata sunt.","title":"Vulgate: Revelation: Revelation Chapter 4","type":"page"}