{"collection":"Bible & Christianity","html_url":"https://unchartedknowledge.5gfusion.net/browse/bib/vul/rev005.htm","path":"bib/vul/rev005.htm","source_url":"https://sacred-texts.com/bib/vul/rev005.htm","text":"1 Et vidi in dextera sedentis supra thronum, librum scriptum intus et foris, signatum sigillis septem.\n2 Et vidi angelum fortem, pr\u00e6dicantem voce magna: Quis est dignus aperire librum, et solvere signacula ejus?\n3 Et nemo poterat neque in c\u00e6lo, neque in terra, neque subtus terram aperire librum, neque respicere illum.\n4 Et ego flebam multum, quoniam nemo dignus inventus est aperire librum, nec videre eum.\n5 Et unus de senioribus dixit mihi: Ne fleveris: ecce vicit leo de tribu Juda, radix David, aperire librum, et solvere septem signacula ejus.\n6 Et vidi: et ecce in medio throni et quatuor animalium, et in medio seniorum, Agnum stantem tamquam occisum, habentem cornua septem, et oculos septem: qui sunt septem spiritus Dei, missi in omnem terram.\n7 Et venit: et accepit de dextera sedentis in throno librum.\n8 Et cum aperuisset librum, quatuor animalia, et viginti quatuor seniores ceciderunt coram Agno, habentes singuli citharas, et phialas aureas plenas odoramentorum, qu\u00e6 sunt orationes sanctorum:\n9 et cantabant canticum novum, dicentes: Dignus es, Domine, accipere librum, et aperire signacula ejus: quoniam occisus es, et redemisti nos Deo in sanguine tuo ex omni tribu, et lingua, et populo, et natione:\n10 et fecisti nos Deo nostro regnum, et sacerdotes: et regnabimus super terram.\n11 Et vidi, et audivi vocem angelorum multorum in circuitu throni, et animalium, et seniorum: et erat numerus eorum millia millium,\n12 dicentium voce magna: Dignus est Agnus, qui occisus est, accipere virtutem, et divinitatem, et sapientiam, et fortitudinem, et honorem, et gloriam, et benedictionem.\n13 Et omnem creaturam, qu\u00e6 in c\u00e6lo est, et super terram, et sub terra, et qu\u00e6 sunt in mari, et qu\u00e6 in eo: omnes audivi dicentes: Sedenti in throno, et Agno, benedictio et honor, et gloria, et potestas in s\u00e6cula s\u00e6culorum.\n14 Et quatuor animalia dicebant: Amen. Et viginti quatuor seniores ceciderunt in facies suas: et adoraverunt viventem in s\u00e6cula s\u00e6culorum.","title":"Vulgate: Revelation: Revelation Chapter 5","type":"page"}