{"collection":"Bible & Christianity","html_url":"https://unchartedknowledge.5gfusion.net/browse/bib/vul/rev006.htm","path":"bib/vul/rev006.htm","source_url":"https://sacred-texts.com/bib/vul/rev006.htm","text":"1 Et vidi quod aperuisset Agnus unum de septem sigillis, et audivi unum de quatuor animalibus, dicens tamquam vocem tonitrui: Veni, et vide.\n2 Et vidi: et ecce equus albus, et qui sedebat super illum, habebat arcum, et data est ei corona, et exivit vincens ut vinceret.\n3 Et cum aperuisset sigillum secundum, audivi secundum animal, dicens: Veni, et vide.\n4 Et exivit alius equus rufus: et qui sedebat super illum, datum est ei ut sumeret pacem de terra, et ut invicem se interficiant, et datus est ei gladius magnus.\n5 Et cum aperuisset sigillum tertium, audivi tertium animal, dicens: Veni, et vide. Et ecce equus niger: et qui sedebat super illum, habebat stateram in manu sua.\n6 Et audivi tamquam vocem in medio quatuor animalium dicentium: Bilibris tritici denario et tres bilibres hordei denario, et vinum, et oleum ne l\u00e6seris.\n7 Et cum aperuisset sigillum quartum, audivi vocem quarti animalis dicentis: Veni, et vide.\n8 Et ecce equus pallidus: et qui sedebat super eum, nomen illi Mors, et infernus sequebatur eum, et data est illi potestas super quatuor partes terr\u00e6, interficere gladio, fame, et morte, et bestiis terr\u00e6.\n9 Et cum aperuisset sigillum quintum, vidi subtus altare animas interfectorum propter verbum Dei, et propter testimonium, quod habebant:\n10 et clamabant voce magna, dicentes: Usquequo Domine (sanctus et verus), non judicas, et non vindicas sanguinem nostrum de iis qui habitant in terra?\n11 Et dat\u00e6 sunt illis singul\u00e6 stol\u00e6 alb\u00e6: et dictum est illis ut requiescerent adhuc tempus modicum donec compleantur conservi eorum, et fratres eorum, qui interficiendi sunt sicut et illi.\n12 Et vidi cum aperuisset sigillum sextum: et ecce terr\u00e6motus magnus factus est, et sol factus est niger tamquam saccus cilicinus: et luna tota facta est sicut sanguis:\n13 et stell\u00e6 de c\u00e6lo ceciderunt super terram, sicut ficus emittit grossos suos cum a vento magno movetur:\n14 et c\u00e6lum recessit sicut liber involutus: et omnis mons, et insul\u00e6 de locis suis mot\u00e6 sunt:\n15 et reges terr\u00e6, et principes, et tribuni, et divites, et fortes, et omnis servus, et liber absconderunt se in speluncis, et in petris montium:\n16 et dicunt montibus, et petris: Cadite super nos, et abscondite nos a facie sedentis super thronum, et ab ira Agni:\n17 quoniam venit dies magnus ir\u00e6 ipsorum: et quis poterit stare?","title":"Vulgate: Revelation: Revelation Chapter 6","type":"page"}