{"collection":"Bible & Christianity","html_url":"https://unchartedknowledge.5gfusion.net/browse/bib/vul/rev007.htm","path":"bib/vul/rev007.htm","source_url":"https://sacred-texts.com/bib/vul/rev007.htm","text":"1 Post h\u00e6c vidi quatuor angelos stantes super quatuor angulos terr\u00e6, tenentes quatuor ventos terr\u00e6, ne flarent super terram, neque super mare, neque in ullam arborem.\n2 Et vidi alterum angelum ascendentem ab ortu solis, habentem signum Dei vivi: et clamavit voce magna quatuor angelis, quibus datum est nocere terr\u00e6 et mari,\n3\u00a0dicens: Nolite nocere terr\u00e6, et mari, neque arboribus, quoadusque signemus servos Dei nostri in frontibus eorum.\n \n4 Et audivi numerum signatorum, centum quadraginta quatuor millia signati, ex omni tribu filiorum Isra\u00ebl.\n5 Ex tribu Juda duodecim millia signati: ex tribu Ruben duodecim millia signati: ex tribu Gad duodecim millia signati:\n6 ex tribu Aser duodecim millia signati: ex tribu Nephthali duodecim millia signati: ex tribu Manasse duodecim millia signati:\n7 ex tribu Simeon duodecim millia signati: ex tribu Levi duodecim millia signati: ex tribu Issachar duodecim millia signati:\n8\u00a0ex tribu Zabulon duodecim millia signati: ex tribu Joseph duodecim millia signati: ex tribu Benjamin duodecim millia signati.\n \n9 Post h\u00e6c vidi turbam magnam, quam dinumerare nemo poterat, ex omnibus gentibus, et tribubus, et populis, et linguis: stantes ante thronum, et in conspectu Agni, amicti stolis albis, et palm\u00e6 in manibus eorum:\n10 et clamabant voce magna, dicentes: Salus Deo nostro, qui sedet super thronum, et Agno.\n11 Et omnes angeli stabant in circuitu throni, et seniorum, et quatuor animalium: et ceciderunt in conspectu throni in facies suas, et adoraverunt Deum,\n12 dicentes: Amen. Benedictio, et claritas, et sapientia, et gratiarum actio, honor, et virtus, et fortitudo Deo nostro in s\u00e6cula s\u00e6culorum. Amen.\n13 Et respondit unus de senioribus et dixit mihi: Hi, qui amicti sunt stolis albis, qui sunt? et unde venerunt?\n14 Et dixi illi: Domine mi, tu scis. Et dixit mihi: Hi sunt, qui venerunt de tribulatione magna, et laverunt stolas suas, et dealbaverunt eas in sanguine Agni.\n15 Ideo sunt ante thronum Dei, et serviunt ei die ac nocte in templo ejus: et qui sedet in throno, habitabit super illos:\n16 non esurient, neque sitient amplius, nec cadet super illos sol, neque ullus \u00e6stus:\n17 quoniam Agnus, qui in medio throni est, reget illos et deducet eos ad vit\u00e6 fontes aquarum, et absterget Deus omnem lacrimam ab oculis eorum.","title":"Vulgate: Revelation: Revelation Chapter 7","type":"page"}