{"collection":"Bible & Christianity","html_url":"https://unchartedknowledge.5gfusion.net/browse/bib/vul/rev008.htm","path":"bib/vul/rev008.htm","source_url":"https://sacred-texts.com/bib/vul/rev008.htm","text":"1 Et cum aperuisset sigillum septimum, factum est silentium in c\u00e6lo, quasi media hora.\n2 Et vidi septem angelos stantes in conspectu Dei: et dat\u00e6 sunt illis septem tub\u00e6.\n3 Et alius angelus venit, et stetit ante altare habens thuribulum aureum: et data sunt illi incensa multa, ut daret de orationibus sanctorum omnium super altare aureum, quod est ante thronum Dei.\n4 Et ascendit fumus incensorum de orationibus sanctorum de manu angeli coram Deo.\n5 Et accepit angelus thuribulum, et implevit illud de igne altaris, et misit in terram: et facta sunt tonitrua, et voces, et fulgura, et terr\u00e6motus magnus.\n6 Et septem angeli, qui habebant septem tubas, pr\u00e6paraverunt se ut tuba canerent.\n7 Et primus angelus tuba cecinit, et facta est grando, et ignis, mista in sanguine, et missum est in terram, et tertia pars terr\u00e6 combusta est, et tertia pars arborum concremata est, et omne f\u0153num viride combustum est.\n8 Et secundus angelus tuba cecinit: et tamquam mons magnus igne ardens missus est in mare, et facta est tertia pars maris sanguis,\n9 et mortua est tertia pars creatur\u00e6 eorum, qu\u00e6 habebant animas in mari, et tertia pars navium interiit.\n10 Et tertius angelus tuba cecinit: et cecidit de c\u00e6lo stella magna, ardens tamquam facula, et cecidit in tertiam partem fluminum, et in fontes aquarum:\n11 et nomen stell\u00e6 dicitur Absinthium, et facta est tertia pars aquarum in absinthium; et multi hominum mortui sunt de aquis, quia amar\u00e6 fact\u00e6 sunt.\n12 Et quartus angelus tuba cecinit: et percussa est tertia pars solis, et tertia pars lun\u00e6, et tertia pars stellarum, ita ut obscuraretur tertia pars eorum, et diei non luceret pars tertia, et noctis similiter.\n13 Et vidi, et audivi vocem unius aquil\u00e6 volantis per medium c\u00e6li dicentis voce magna: V\u00e6, v\u00e6, v\u00e6 habitantibus in terra de ceteris vocibus trium angelorum, qui erant tuba canituri.","title":"Vulgate: Revelation: Revelation Chapter 8","type":"page"}