{"collection":"Bible & Christianity","html_url":"https://unchartedknowledge.5gfusion.net/browse/bib/vul/rev009.htm","path":"bib/vul/rev009.htm","source_url":"https://sacred-texts.com/bib/vul/rev009.htm","text":"1 Et quintus angelus tuba cecinit: et vidi stellam de c\u00e6lo cecidisse in terram, et data est ei clavis putei abyssi.\n2 Et aperuit puteum abyssi: et ascendit fumus putei, sicut fumus fornacis magn\u00e6: et obscuratus est sol, et a\u00ebr de fumo putei:\n3 et de fumo putei exierunt locust\u00e6 in terram, et data est illis potestas, sicut habent potestatem scorpiones terr\u00e6:\n4 et pr\u00e6ceptum est illis ne l\u00e6derent f\u0153num terr\u00e6, neque omne viride, neque omnem arborem: nisi tantum homines, qui non habent signum Dei in frontibus suis:\n5 et datum est illis ne occiderent eos: sed ut cruciarent mensibus quinque: et cruciatus eorum, ut cruciatus scorpii cum percutit hominem.\n6 Et in diebus illis qu\u00e6rent homines mortem, et non invenient eam: et desiderabunt mori, et fugiet mors ab eis.\n7 Et similitudines locustarum, similes equis paratis in pr\u00e6lium: et super capita earum tamquam coron\u00e6 similes auro: et facies earum tamquam facies hominum.\n8 Et habebant capillos sicut capillos mulierum. Et dentes earum, sicut dentes leonum erant:\n9 et habebant loricas sicut loricas ferreas, et vox alarum earum sicut vox curruum equorum multorum currentium in bellum:\n10 et habebant caudas similes scorpionum, et aculei erant in caudis earum: et potestas earum nocere hominibus mensibus quinque:\n11 et habebant super se regem angelum abyssi cui nomen hebraice Abaddon, gr\u00e6ce autem Apollyon, latine habens nomen Exterminans.\n12\u00a0V\u00e6 unum abiit, et ecce veniunt adhuc duo v\u00e6 post h\u00e6c.\n \n13 Et sextus angelus tuba cecinit: et audivi vocem unam ex quatuor cornibus altaris aurei, quod est ante oculos Dei,\n14 dicentem sexto angelo, qui habebat tubam: Solve quatuor angelos, qui alligati sunt in flumine magno Euphrate.\n15 Et soluti sunt quatuor angeli, qui parati erant in horam, et diem, et mensem, et annum, ut occiderent tertiam partem hominum.\n16 Et numerus equestris exercitus vicies millies dena millia. Et audivi numerum eorum.\n17 Et ita vidi equos in visione: et qui sedebant super eos, habebant loricas igneas, et hyacinthinas, et sulphureas, et capita eorum erant tamquam capita leonum: et de ore eorum procedit ignis, et fumus, et sulphur.\n18 Et ab his tribus plagis occisa est tertia pars hominum de igne, et de fumo, et sulphure, qu\u00e6 procedebant de ore ipsorum.\n19 Potestas enim equorum in ore eorum est, et in caudis eorum, nam caud\u00e6 eorum similes serpentibus, habentes capita: et in his nocent.\n20 Et ceteri homines, qui non sunt occisi in his plagis, neque p\u0153nitentiam egerunt de operibus manuum suarum, ut non adorarent d\u00e6monia, et simulacra aurea, et argentea, et \u00e6rea, et lapidea, et lignea, qu\u00e6 neque videre possunt, neque audire, neque ambulare,\n21 et non egerunt p\u0153nitentiam ab homicidiis suis, neque a veneficiis suis, neque a fornicatione sua, neque a furtis suis.","title":"Vulgate: Revelation: Revelation Chapter 9","type":"page"}