{"collection":"Bible & Christianity","html_url":"https://unchartedknowledge.5gfusion.net/browse/bib/vul/rev012.htm","path":"bib/vul/rev012.htm","source_url":"https://sacred-texts.com/bib/vul/rev012.htm","text":"1 Et signum magnum apparuit in c\u00e6lo: mulier amicta sole, et luna sub pedibus ejus, et in capite ejus corona stellarum duodecim:\n2 et in utero habens, clamabat parturiens, et cruciabatur ut pariat.\n3 Et visum est aliud signum in c\u00e6lo: et ecce draco magnus rufus habens capita septem, et cornua decem: et in capitibus ejus diademata septem,\n4 et cauda ejus trahebat tertiam partem stellarum c\u00e6li, et misit eas in terram: et draco stetit ante mulierem, qu\u00e6 erat paritura, ut cum peperisset, filium ejus devoraret.\n5 Et peperit filium masculum, qui recturus erat omnes gentes in virga ferrea: et raptus est filius ejus ad Deum, et ad thronum ejus,\n6\u00a0et mulier fugit in solitudinem ubi habebat locum paratum a Deo, ut ibi pascant eam diebus mille ducentis sexaginta.\n \n7 Et factum est pr\u00e6lium magnum in c\u00e6lo: Micha\u00ebl et angeli ejus pr\u00e6liabantur cum dracone, et draco pugnabat, et angeli ejus:\n8 et non valuerunt, neque locus inventus est eorum amplius in c\u00e6lo.\n9 Et projectus est draco ille magnus, serpens antiquus, qui vocatur diabolus, et Satanas, qui seducit universum orbem: et projectus est in terram, et angeli ejus cum illo missi sunt.\n10 Et audivi vocem magnam in c\u00e6lo dicentem: Nunc facta est salus, et virtus, et regnum Dei nostri, et potestas Christi ejus: quia projectus est accusator fratrum nostrorum, qui accusabat illos ante conspectum Dei nostri die ac nocte.\n11 Et ipsi vicerunt eum propter sanguinem Agni, et propter verbum testimonii sui, et non dilexerunt animas suas usque ad mortem.\n12\u00a0Propterea l\u00e6tamini c\u00e6li, et qui habitatis in eis. V\u00e6 terr\u00e6, et mari, quia descendit diabolus ad vos habens iram magnam, sciens quod modicum tempus habet.\n \n13 Et postquam vidit draco quod projectus esset in terram, persecutus est mulierem, qu\u00e6 peperit masculum:\n14 et dat\u00e6 sunt mulieri al\u00e6 du\u00e6 aquil\u00e6 magn\u00e6 ut volaret in desertum in locum suum, ubi alitur per tempus et tempora, et dimidium temporis a facie serpentis.\n15 Et misit serpens ex ore suo post mulierem, aquam tamquam flumen, ut eam faceret trahi a flumine.\n16 Et adjuvit terra mulierem, et aperuit terra os suum, et absorbuit flumen, quod misit draco de ore suo.\n17 Et iratus est draco in mulierem: et abiit facere pr\u00e6lium cum reliquis de semine ejus, qui custodiunt mandata Dei, et habent testimonium Jesu Christi.\n18 Et stetit supra arenam maris.","title":"Vulgate: Revelation: Revelation Chapter 12","type":"page"}