{"collection":"Bible & Christianity","html_url":"https://unchartedknowledge.5gfusion.net/browse/bib/vul/rev013.htm","path":"bib/vul/rev013.htm","source_url":"https://sacred-texts.com/bib/vul/rev013.htm","text":"1 Et vidi de mari bestiam ascendentem habentem capita septem, et cornua decem, et super cornua ejus decem diademata, et super capita ejus nomina blasphemi\u00e6.\n2 Et bestia, quam vidi, similis erat pardo, et pedes ejus sicut pedes ursi, et os ejus sicut os leonis. Et dedit illi draco virtutem suam, et potestatem magnam.\n3 Et vidi unum de capitibus suis quasi occisum in mortem: et plaga mortis ejus curata est. Et admirata est universa terra post bestiam.\n4 Et adoraverunt draconem, qui dedit potestatem besti\u00e6: et adoraverunt bestiam, dicentes: Quis similis besti\u00e6? et quis poterit pugnare cum ea?\n5 Et datum est ei os loquens magna et blasphemias: et data est ei potestas facere menses quadraginta duos.\n6 Et aperuit os suum in blasphemias ad Deum, blasphemare nomen ejus, et tabernaculum ejus, et eos qui in c\u00e6lo habitant.\n7 Et est datum illi bellum facere cum sanctis, et vincere eos. Et data est illi potestas in omnem tribum, et populum, et linguam, et gentem,\n8 et adoraverunt eam omnes, qui inhabitant terram: quorum non sunt scripta nomina in libro vit\u00e6 Agni, qui occisus est ab origine mundi.\n9 Si quis habet aurem, audiat.\n10\u00a0Qui in captivitatem duxerit, in captivitatem vadet: qui in gladio occiderit, oportet eum gladio occidi. Hic est patientia, et fides sanctorum.\n \n11 Et vidi aliam bestiam ascendentem de terra, et habebat cornua duo similia Agni, et loquebatur sicut draco.\n12 Et potestatem prioris besti\u00e6 omnem faciebat in conspectu ejus: et fecit terram, et habitantes in ea, adorare bestiam primam, cujus curata est plaga mortis.\n13 Et fecit signa magna, ut etiam ignem faceret de c\u00e6lo descendere in terram in conspectu hominum.\n14 Et seduxit habitantes in terra propter signa, qu\u00e6 data sunt illi facere in conspectu besti\u00e6, dicens habitantibus in terra, ut faciant imaginem besti\u00e6, qu\u00e6 habet plagam gladii, et vixit.\n15 Et datum est illi ut daret spiritum imagini besti\u00e6, et ut loquatur imago besti\u00e6: et faciat ut quicumque non adoraverint imaginem besti\u00e6, occidantur.\n16 Et faciet omnes pusillos, et magnos, et divites, et pauperes, et liberos, et servos habere caracterem in dextera manu sua, aut in frontibus suis:\n17 et nequis possit emere, aut vendere, nisi qui habet caracterem, aut nomen besti\u00e6, aut numerum nominis ejus.\n18 Hic sapientia est. Qui habet intellectum, computet numerum besti\u00e6. Numerus enim hominis est: et numerus ejus sexcenti sexaginta sex.","title":"Vulgate: Revelation: Revelation Chapter 13","type":"page"}