{"collection":"Bible & Christianity","html_url":"https://unchartedknowledge.5gfusion.net/browse/bib/vul/rev015.htm","path":"bib/vul/rev015.htm","source_url":"https://sacred-texts.com/bib/vul/rev015.htm","text":"1 Et vidi aliud signum in c\u00e6lo magnum et mirabile, angelos septem, habentes plagas septem novissimas: quoniam in illis consummata est ira Dei.\n2 Et vidi tamquam mare vitreum mistum igne, et eos, qui vicerunt bestiam, et imaginem ejus, et numerum nominis ejus, stantes super mare vitreum, habentes citharas Dei:\n3 et cantantes canticum Moysi servi Dei, et canticum Agni, dicentes: Magna et mirabilia sunt opera tua, Domine Deus omnipotens: just\u00e6 et ver\u00e6 sunt vi\u00e6 tu\u00e6, Rex s\u00e6culorum.\n4\u00a0Quis non timebit te, Domine, et magnificabit nomen tuum? quia solus pius es: quoniam omnes gentes venient, et adorabunt in conspectu tuo, quoniam judicia tua manifesta sunt.\n \n5 Et post h\u00e6c vidi: et ecce apertum est templum tabernaculi testimonii in c\u00e6lo,\n6 et exierunt septem angeli habentes septem plagas de templo, vestiti lino mundo et candido, et pr\u00e6cincti circa pectora zonis aureis.\n7 Et unum de quatuor animalibus dedit septem angelis septem phialas aureas, plenas iracundi\u00e6 Dei viventis in s\u00e6cula s\u00e6culorum.\n8 Et impletum est templum fumo a majestate Dei, et de virtute ejus: et nemo poterat introire in templum, donec consummarentur septem plag\u00e6 septem angelorum.","title":"Vulgate: Revelation: Revelation Chapter 15","type":"page"}