{"collection":"Bible & Christianity","html_url":"https://unchartedknowledge.5gfusion.net/browse/bib/vul/rev017.htm","path":"bib/vul/rev017.htm","source_url":"https://sacred-texts.com/bib/vul/rev017.htm","text":"1 Et venit unus de septem angelis, qui habebant septem phialas, et locutus est mecum, dicens: Veni, ostendam tibi damnationem meretricis magn\u00e6, qu\u00e6 sedet super aquas multas,\n2 cum qua fornicati sunt reges terr\u00e6, et inebriati sunt qui inhabitant terram de vino prostitutionis ejus.\n3 Et abstulit me in spiritu in desertum. Et vidi mulierem sedentem super bestiam coccineam, plenam nominibus blasphemi\u00e6, habentem capita septem, et cornua decem.\n4 Et mulier erat circumdata purpura, et coccino, et inaurata auro, et lapide pretioso, et margaritis, habens poculum aureum in manu sua, plenum abominatione, et immunditia fornicationis ejus.\n5 Et in fronte ejus nomen scriptum: Mysterium: Babylon magna, mater fornicationum, et abominationum terr\u00e6.\n6 Et vidi mulierem ebriam de sanguine sanctorum, et de sanguine martyrum Jesu. Et miratus sum cum vidissem illam admiratione magna.\n7 Et dixit mihi angelus: Quare miraris? ego dicam tibi sacramentum mulieris, et besti\u00e6, qu\u00e6 portat eam, qu\u00e6 habet capita septem, et cornua decem.\n8 Bestia, quam vidisti, fuit, et non est, et ascensura est de abysso, et in interitum ibit: et mirabuntur inhabitantes terram (quorum non sunt scripta nomina in libro vit\u00e6 a constitutione mundi) videntes bestiam, qu\u00e6 erat, et non est.\n9 Et hic est sensus, qui habet sapientiam. Septem capita, septem montes sunt, super quos mulier sedet, et reges septem sunt.\n10 Quinque ceciderunt, unus est, et alius nondum venit: et cum venerit, oportet illum breve tempus manere.\n11 Et bestia, qu\u00e6 erat, et non est: et ipsa octava est: et de septem est, et in interitum vadit.\n12 Et decem cornua, qu\u00e6 vidisti, decem reges sunt: qui regnum nondum acceperunt, sed potestatem tamquam reges una hora accipient post bestiam.\n13 Hi unum consilium habent, et virtutem, et potestatem suam besti\u00e6 tradent.\n14 Hi cum Agno pugnabunt, et Agnus vincet illos: quoniam Dominus dominorum est, et Rex regum, et qui cum illo sunt, vocati, electi, et fideles.\n15 Et dixit mihi: Aqu\u00e6, quas vidisti ubi meretrix sedet, populi sunt, et gentes, et lingu\u00e6.\n16 Et decem cornua, qu\u00e6 vidisti in bestia: hi odient fornicariam, et desolatam facient illam, et nudam, et carnes ejus manducabunt, et ipsam igni concremabunt.\n17 Deus enim dedit in corda eorum ut faciant quod placitum est illi: ut dent regnum suum besti\u00e6 donec consummentur verba Dei.\n18 Et mulier, quam vidisti, est civitas magna, qu\u00e6 habet regnum super reges terr\u00e6.","title":"Vulgate: Revelation: Revelation Chapter 17","type":"page"}