{"collection":"Bible & Christianity","html_url":"https://unchartedknowledge.5gfusion.net/browse/bib/vul/rev020.htm","path":"bib/vul/rev020.htm","source_url":"https://sacred-texts.com/bib/vul/rev020.htm","text":"1 Et vidi angelum descendentem de c\u00e6lo, habentem clavem abyssi, et catenam magnam in manu sua.\n2 Et apprehendit draconem, serpentem antiquum, qui est diabolus, et Satanas, et ligavit eum per annos mille:\n3\u00a0et misit eum in abyssum, et clausit, et signavit super illum ut non seducat amplius gentes, donec consummentur mille anni: et post h\u00e6c oportet illum solvi modico tempore.\n \n4 Et vidi sedes, et sederunt super eas, et judicium datum est illis: et animas decollatorum propter testimonium Jesu, et propter verbum Dei, et qui non adoraverunt bestiam, neque imaginem ejus, nec acceperunt caracterem ejus in frontibus, aut in manibus suis, et vixerunt, et regnaverunt cum Christo mille annis.\n5 Ceteri mortuorum non vixerunt, donec consummentur mille anni. H\u00e6c est resurrectio prima.\n6\u00a0Beatus, et sanctus, qui habet partem in resurrectione prima: in his secunda mors non habet potestatem: sed erunt sacerdotes Dei et Christi, et regnabunt cum illo mille annis.\n \n7 Et cum consummati fuerint mille anni, solvetur Satanas de carcere suo, et exibit, et seducet gentes, qu\u00e6 sunt super quatuor angulos terr\u00e6, Gog, et Magog, et congregabit eos in pr\u00e6lium, quorum numerus est sicut arena maris.\n8 Et ascenderunt super latitudinem terr\u00e6, et circuierunt castra sanctorum, et civitatem dilectam.\n9 Et descendit ignis a Deo de c\u00e6lo, et devoravit eos: et diabolus, qui seducebat eos, missus est in stagnum ignis, et sulphuris, ubi et bestia\n10 et pseudopropheta cruciabuntur die ac nocte in s\u00e6cula s\u00e6culorum.\n11 Et vidi thronum magnum candidum, et sedentem super eum, a cujus conspectu fugit terra, et c\u00e6lum, et locus non est inventus eis.\n12 Et vidi mortuos, magnos et pusillos, stantes in conspectu throni, et libri aperti sunt: et alius liber apertus est, qui est vit\u00e6: et judicati sunt mortui ex his, qu\u00e6 scripta erant in libris, secundum opera ipsorum:\n13 et dedit mare mortuos, qui in eo erant: et mors et infernus dederunt mortuos suos, qui in ipsis erant: et judicatum est de singulis secundum opera ipsorum.\n14 Et infernus et mors missi sunt in stagnum ignis. H\u00e6c est mors secunda.\n15 Et qui non inventus est in libro vit\u00e6 scriptus, missus est in stagnum ignis.","title":"Vulgate: Revelation: Revelation Chapter 20","type":"page"}