{"collection":"Bible & Christianity","html_url":"https://unchartedknowledge.5gfusion.net/browse/bib/vul/rev022.htm","path":"bib/vul/rev022.htm","source_url":"https://sacred-texts.com/bib/vul/rev022.htm","text":"1 Et ostendit mihi fluvium aqu\u00e6 vit\u00e6, splendidum tamquam crystallum, procedentem de sede Dei et Agni.\n2 In medio plate\u00e6 ejus, et ex utraque parte fluminis, lignum vit\u00e6, afferens fructus duodecim per menses singulos, reddens fructum suum et folia ligni ad sanitatem gentium.\n3 Et omne maledictum non erit amplius: sed sedes Dei et Agni in illa erunt, et servi ejus servient illi.\n4 Et videbunt faciem ejus: et nomen ejus in frontibus eorum.\n5\u00a0Et nox ultra non erit: et non egebunt lumine lucern\u00e6, neque lumine solis, quoniam Dominus Deus illuminabit illos, et regnabunt in s\u00e6cula s\u00e6culorum.\n \n6 Et dixit mihi: H\u00e6c verba fidelissima sunt, et vera. Et Dominus Deus spirituum prophetarum misit angelum suum ostendere servis suis qu\u00e6 oportet fieri cito.\n7 Et ecce venio velociter. Beatus, qui custodit verba propheti\u00e6 libri hujus.\n8 Et ego Joannes, qui audivi, et vidi h\u00e6c. Et postquam audissem, et vidissem, cecidi ut adorarem ante pedes angeli, qui mihi h\u00e6c ostendebat:\n9 et dixit mihi: Vide ne feceris: conservus enim tuus sum, et fratrum tuorum prophetarum, et eorum qui servant verba propheti\u00e6 libri hujus: Deum adora.\n10 Et dicit mihi: Ne signaveris verba propheti\u00e6 libri hujus: tempus enim prope est.\n11 Qui nocet, noceat adhuc: et qui in sordibus est, sordescat adhuc: et qui justus est, justificetur adhuc: et sanctus, sanctificetur adhuc.\n12 Ecce venio cito, et merces mea mecum est, reddere unicuique secundum opera sua.\n13 Ego sum alpha et omega, primus et novissimus, principium et finis.\n14 Beati, qui lavant stolas suas in sanguine Agni: ut sit potestas eorum in ligno vit\u00e6, et per portas intrent in civitatem.\n15 Foris canes, et venefici, et impudici, et homicid\u00e6, et idolis servientes, et omnis qui amat et facit mendacium.\n16 Ego Jesus misi angelum meum testificari vobis h\u00e6c in ecclesiis. Ego sum radix, et genus David, stella splendida et matutina.\n17 Et spiritus, et sponsa dicunt: Veni. Et qui audit, dicat: Veni. Et qui sitit, veniat: et qui vult, accipiat aquam vit\u00e6, gratis.\n18 Contestor enim omni audienti verba propheti\u00e6 libri hujus: si quis apposuerit ad h\u00e6c, apponet Deus super illum plagas scriptas in libro isto.\n19 Et si quis diminuerit de verbis libri propheti\u00e6 hujus, auferet Deus partem ejus de libro vit\u00e6, et de civitate sancta, et de his qu\u00e6 scripta sunt in libro isto:\n20 dicit qui testimonium perhibet istorum. Etiam venio cito: amen. Veni, Domine Jesu.\n21 Gratia Domini nostri Jesu Christi cum omnibus vobis. Amen.","title":"Vulgate: Revelation: Revelation Chapter 22","type":"page"}