{"collection":"Bible & Christianity","html_url":"https://unchartedknowledge.5gfusion.net/browse/bib/vul/rut002.htm","path":"bib/vul/rut002.htm","source_url":"https://sacred-texts.com/bib/vul/rut002.htm","text":"1 Erat autem viro Elimelech consanguineus, homo potens, et magnarum opum, nomine Booz.\n2 Dixitque Ruth Moabitis ad socrum suam: Si jubes, vadam in agrum, et colligam spicas qu\u00e6 fugerint manus metentium, ubicumque clementis in me patrisfamilias reperero gratiam. Cui illa respondit: Vade, filia mea.\n3 Abiit itaque et colligebat spicas post terga metentium. Accidit autem ut ager ille haberet dominum nomine Booz, qui erat de cognatione Elimelech.\n4 Et ecce, ipse veniebat de Bethlehem, dixitque messoribus: Dominus vobiscum. Qui responderunt ei: Benedicat tibi Dominus.\n5 Dixitque Booz juveni, qui messoribus pr\u00e6erat: Cujus est h\u00e6c puella?\n6 Cui respondit: H\u00e6c est Moabitis, qu\u00e6 venit cum No\u00ebmi, de regione Moabitide,\n7 et rogavit ut spicas colligeret remanentes, sequens messorum vestigia: et de mane usque nunc stat in agro, et ne ad momentum quidem domum reversa est.\n8 Et ait Booz ad Ruth: Audi, filia, ne vadas in alterum agrum ad colligendum, nec recedas ab hoc loco: sed jungere puellis meis,\n9 et ubi messuerint, sequere. Mandavi enim pueris meis, ut nemo molestus sit tibi: sed etiam si sitieris, vade ad sarcinulas, et bibe aquas, de quibus et pueri bibunt.\n10 Qu\u00e6 cadens in faciem suam et adorans super terram, dixit ad eum: Unde mihi hoc, ut invenirem gratiam ante oculos tuos, et nosse me dignareris peregrinam mulierem?\n11 Cui ille respondit: Nuntiata sunt mihi omnia qu\u00e6 feceris socrui tu\u00e6 post mortem viri tui: et quod reliqueris parentes tuos, et terram in qua nata es, et veneris ad populum, quem antea nesciebas.\n12 Reddat tibi Dominus pro opere tuo, et plenam mercedem recipias a Domino Deo Isra\u00ebl, ad quem venisti, et sub cujus confugisti alas.\n13 Qu\u00e6 ait: Inveni gratiam apud oculos tuos, domine mi, qui consolatus es me, et locutus es ad cor ancill\u00e6 tu\u00e6, qu\u00e6 non sum similis unius puellarum tuarum.\n14 Dixitque ad eam Booz: Quando hora vescendi fuerit, veni huc, et comede panem, et intinge buccellam tuam in aceto. Sedit itaque ad messorum latus, et congessit polentam sibi, comeditque et saturata est, et tulit reliquias.\n15 Atque inde surrexit, ut spicas ex more colligeret. Pr\u00e6cepit autem Booz pueris suis, dicens: Etiamsi vobiscum metere voluerit, ne prohibeatis eam:\n16 et de vestris quoque manipulis projicite de industria, et remanere permittite, ut absque rubore colligat, et colligentem nemo corripiat.\n17 Collegit ergo in agro usque ad vesperam: et qu\u00e6 collegerat virga c\u00e6dens et excutiens, invenit hordei quasi ephi mensuram, id est, tres modios.\n18 Quos portans reversa est in civitatem, et ostendit socrui su\u00e6: insuper protulit, et dedit ei de reliquiis cibi sui, quo saturata fuerat.\n19 Dixitque ei socrus sua: Ubi hodie collegisti, et ubi fecisti opus? sit benedictus qui misertus est tui. Indicavitque ei apud quem fuisset operata: et nomen dixit viri, quod Booz vocaretur.\n20 Cui respondit No\u00ebmi: Benedictus sit a Domino: quoniam eamdem gratiam, quam pr\u00e6buerat vivis, servavit et mortuis. Rursumque ait: Propinquus noster est homo.\n21 Et ait Ruth: Hoc quoque, inquit, pr\u00e6cepit mihi, ut tamdiu messoribus ejus jungerer, donec omnes segetes meterentur.\n22 Cui dixit socrus: Melius est, filia mea, ut cum puellis ejus exeas ad metendum, ne in alieno agro quispiam resistat tibi.\n23 Juncta est itaque puellis Booz: et tamdiu cum eis messuit, donec hordea et triticum in horreis conderentur.","title":"Vulgate: Ruth: Ruth Chapter 2","type":"page"}