{"collection":"Bible & Christianity","html_url":"https://unchartedknowledge.5gfusion.net/browse/bib/vul/sa1005.htm","path":"bib/vul/sa1005.htm","source_url":"https://sacred-texts.com/bib/vul/sa1005.htm","text":"1 Philisthiim autem tulerunt arcam Dei, et asportaverunt eam a lapide Adjutorii in Azotum.\n2 Tuleruntque Philisthiim arcam Dei, et intulerunt eam in templum Dagon, et statuerunt eam juxta Dagon.\n3 Cumque surrexissent diluculo Azotii altera die, ecce Dagon jacebat pronus in terra ante arcam Domini: et tulerunt Dagon, et restituerunt eum in locum suum.\n4 Rursumque mane die altera consurgentes, invenerunt Dagon jacentem super faciem suam in terra coram arca Domini: caput autem Dagon, et du\u00e6 palm\u00e6 manuum ejus absciss\u00e6 erant super limen:\n5 porro Dagon solus truncus remanserat in loco suo. Propter hanc causam non calcant sacerdotes Dagon, et omnes qui ingrediuntur templum ejus, super limen Dagon in Azoto, usque in hodiernum diem.\n6 Aggravata est autem manus Domini super Azotios, et demolitus est eos: et percussit in secretiori parte natium Azotum, et fines ejus. Et ebullierunt vill\u00e6 et agri in medio regionis illius, et nati sunt mures et facta est confusio mortis magn\u00e6 in civitate.\n7 Videntes autem viri Azotii hujuscemodi plagam, dixerunt: Non maneat arca Dei Isra\u00ebl apud nos: quoniam dura est manus ejus super nos, et super Dagon deum nostrum.\n8 Et mittentes congregaverunt omnes satrapas Philisthinorum ad se, et dixerunt: Quid faciemus de arca Dei Isra\u00ebl? Responderuntque Geth\u00e6i: Circumducatur arca Dei Isra\u00ebl. Et circumduxerunt arcam Dei Isra\u00ebl.\n9 Illis autem circumducentibus eam, fiebat manus Domini per singulas civitates interfectionis magn\u00e6 nimis: et percutiebat viros uniuscujusque urbis, a parvo usque ad majorem, et computrescebant prominentes extales eorum. Inieruntque Geth\u00e6i consilium, et fecerunt sibi sedes pelliceas.\n10 Miserunt ergo arcam Dei in Accaron. Cumque venisset arca Dei in Accaron, exclamaverunt Accaronit\u00e6, dicentes: Adduxerunt ad nos arcam Dei Isra\u00ebl ut interficiat nos et populum nostrum.\n11 Miserunt itaque et congregaverunt omnes satrapas Philisthinorum: qui dixerunt: Dimittite arcam Dei Isra\u00ebl, et revertatur in locum suum, et non interficiat nos cum populo nostro.\n12 Fiebat enim pavor mortis in singulis urbibus, et gravissima valde manus Dei. Viri quoque qui mortui non fuerant, percutiebantur in secretiori parte natium: et ascendebat ululatus uniuscujusque civitatis in c\u00e6lum.","title":"Vulgate: 1 Samuel: 1 Samuel Chapter 5","type":"page"}