{"collection":"Bible & Christianity","html_url":"https://unchartedknowledge.5gfusion.net/browse/bib/vul/sa1012.htm","path":"bib/vul/sa1012.htm","source_url":"https://sacred-texts.com/bib/vul/sa1012.htm","text":"1 Dixit autem Samuel ad universum Isra\u00ebl: Ecce audivi vocem vestram juxta omnia qu\u00e6 locuti estis ad me, et constitui super vos regem.\n2 Et nunc rex graditur ante vos: ego autem senui, et incanui: porro filii mei vobiscum sunt: itaque conversatus coram vobis ab adolescentia mea usque ad hanc diem, ecce pr\u00e6sto sum.\n3 Loquimini de me coram Domino, et coram christo ejus, utrum bovem cujusquam tulerim, aut asinum: si quempiam calumniatus sum, si oppressi aliquem, si de manu cujusquam munus accepi: et contemnam illud hodie, restituamque vobis.\n4 Et dixerunt: Non es calumniatus nos, neque oppressisti, neque tulisti de manu alicujus quippiam.\n5\u00a0Dixitque ad eos: Testis est Dominus adversum vos, et testis christus ejus in die hac, quia non inveneritis in manu mea quippiam. Et dixerunt: Testis.\n \n6 Et ait Samuel ad populum: Dominus, qui fecit Moysen et Aaron, et eduxit patres nostros de terra \u00c6gypti.\n7 Nunc ergo state, ut judicio contendam adversum vos coram Domino de omnibus misericordiis Domini quas fecit vobiscum et cum patribus vestris:\n8 quomodo Jacob ingressus est in \u00c6gyptum, et clamaverunt patres vestri ad Dominum: et misit Dominus Moysen et Aaron, et eduxit patres vestros de \u00c6gypto, et collocavit eos in loco hoc.\n9 Qui obliti sunt Domini Dei sui, et tradidit eos in manu Sisar\u00e6 magistri militi\u00e6 Hasor, et in manu Philisthinorum, et in manu regis Moab: et pugnaverunt adversum eos.\n10 Postea autem clamaverunt ad Dominum, et dixerunt: Peccavimus, quia dereliquimus Dominum, et servivimus Baalim et Astaroth: nunc ergo erue nos de manu inimicorum nostrorum, et serviemus tibi.\n11 Et misit Dominus Jerobaal, et Badan, et Jephte, et Samuel, et eruit vos de manu inimicorum vestrorum per circuitum, et habitastis confidenter.\n12 Videntes autem quod Naas rex filiorum Ammon venisset adversum vos, dixistis mihi: Nequaquam, sed rex imperabit nobis: cum Dominus Deus vester regnaret in vobis.\n13 Nunc ergo pr\u00e6sto est rex vester, quem elegistis et petistis: ecce dedit vobis Dominus regem.\n14 Si timueritis Dominum, et servieritis ei, et audieritis vocem ejus, et non exasperaveritis os Domini, eritis et vos, et rex qui imperat vobis, sequentes Dominum Deum vestrum:\n15 si autem non audieritis vocem Domini, sed exasperaveritis sermones ejus, erit manus Domini super vos, et super patres vestros.\n16 Sed et nunc state, et videte rem istam grandem quam facturus est Dominus in conspectu vestro.\n17 Numquid non messis tritici est hodie? invocabo Dominum, et dabit voces et pluvias: et scietis, et videbitis, quia grande malum feceritis vobis in conspectu Domini, petentes super vos regem.\n18\u00a0Et clamavit Samuel ad Dominum, et dedit Dominus voces et pluvias in illa die.\n \n19 Et timuit omnis populus nimis Dominum et Samuelem, et dixit universus populus ad Samuelem: Ora pro servis tuis ad Dominum Deum tuum, ut non moriamur: addidimus enim universis peccatis nostris malum, ut peteremus nobis regem.\n20 Dixit autem Samuel ad populum: Nolite timere: vos fecistis universum malum hoc, verumtamen nolite recedere a tergo Domini, sed servite Domino in omni corde vestro.\n21 Et nolite declinare post vana, qu\u00e6 non proderunt vobis, neque eruent vos, quia vana sunt.\n22 Et non derelinquet Dominus populum suum propter nomen suum magnum: quia juravit Dominus facere vos sibi populum.\n23 Absit autem a me hoc peccatum in Dominum, ut cessem orare pro vobis, et docebo vos viam bonam et rectam.\n24 Igitur timete Dominum, et servite ei in veritate, et ex toto corde vestro: vidistis enim magnifica qu\u00e6 in vobis gesserit.\n25 Quod si perseveraveritis in malitia, et vos et rex vester pariter peribitis.","title":"Vulgate: 1 Samuel: 1 Samuel Chapter 12","type":"page"}